बुडापेस्ट; वृत्तसंस्था : युफा विश्वचषक पात्रता फेरीत पोर्तुगालने हंगेरीवर 3-2 असा रोमहर्षक विजय मिळवला. जोआओ कॅन्सेलोने सामन्याच्या अखेरच्या क्षणी निर्णायक गोल करत पोर्तुगालला विजयापर्यंत नेले. या विजयासह पोर्तुगालचा संघ ‘एफ’ गटात दोन विजयांसह अव्वल स्थानावर पोहोचला आहे.
सामन्यात पोर्तुगालने पिछाडीवरून पुनरागमन करत आघाडी घेतली; पण हंगेरीने बरोबरी साधल्यानंतर लगेचच कॅन्सेलोने गोल करत संघाचा विजय निश्चित केला. या विजयामुळे पोर्तुगालने शनिवारी अर्मेनियावर मिळवलेल्या 5-0 विजयानंतर आणखी तीन गुण मिळवले. सामन्याच्या 21 व्या मिनिटाला बार्नाबास वर्गीने झ्सोल्ट नागीच्या पासवर गोल करून हंगेरीला आघाडी मिळवून दिली; पण पोर्तुगालने 15 मिनिटांनी बर्नान्डो सिल्वाच्या गोलने बरोबरी साधली. त्यानंतर प्रतिस्पर्ध्यांच्या धक्काबुक्कीमुळे रोनाल्डोला पेनल्टी मिळाली आणि त्याने गोल करून संघाला आघाडीवर आणले.
हा गोल रोनाल्डोचा विश्वचषक पात्रता स्पर्धेतील 39 वा गोल ठरला. यासह त्याने ग्वाटेमालाच्या कार्लोस रुईझची बरोबरी साधली. रोनाल्डोने त्याच्या 223 व्या आंतरराष्ट्रीय सामन्यात 141 गोलचा आंतरराष्ट्रीय विक्रमही नोंदवला. शनिवारी आयर्लंडविरुद्ध 2-2 अशी बरोबरी साधणार्‍या हंगेरीने 84 व्या मिनिटाला वर्गीच्या दुसर्‍या गोलने पुन्हा बरोबरी साधली; पण अवघ्या दोन मिनिटांनंतर बर्नान्डो सिल्वाच्या पासवर कॅन्सेलोने क्षेत्ररक्षकाच्या बाहेरून शानदार गोल करून पोर्तुगालचा विजय निश्चित केला.
या स्पर्धेत पाच सामने खेळल्यानंतर नॉर्वे 15 गुणांसह ‘आय’ गटात अव्वल स्थानावर आहे. दुसर्‍या स्थानावर असलेल्या इटलीपेक्षा ते 6 गुणांनी पुढे आहेत. मोल्डोव्हाला या स्पर्धेतील सर्वात मोठा पराभव पत्करावा लागला असून, ते गटात सर्वात शेवटी आहेत. गटातील विजेते संघ थेट विश्वचषकासाठी पात्र ठरतात, तर उपविजेते प्लेऑफमध्ये खेळतात. हालांडच्या पासवर फेलिक्स हॉर्न मायरेने सहाव्या मिनिटाला पहिला गोल केला. त्यानंतर मार्टिन ओडेगार्डने एक मिनिटानंतर दुसरा गोल करण्याची संधी गमावली.
मंगळवारी झालेल्या आणखी एका सामन्यात अर्मेनियाने आयर्लंडचा 2-1 असा पराभव केला. या विजयासह आर्मेनिया 3 गुणांसह दुसर्‍या स्थानावर आहे, तर हंगेरी आणि आयर्लंड प्रत्येकी एका गुणावर आहेत. दुसर्‍या एका सामन्यात नॉर्वेने मोल्डोव्हाचा 11-1 असा धुव्वा उडवला. एर्लिंग हालांडने 5, तर बदली खेळाडू थेलो आसगार्डने 4 गोल केले. या विजयासह नॉर्वे 1998 नंतर पहिल्यांदा विश्वचषकासाठी पात्र ठरण्याच्या दिशेने एक मोठे पाऊल टाकले आहे.