गाले, वृत्तसंस्था : श्रीलंकेविरुद्धची (SL vs PAK) पहिली कसोटी अखेर पाकिस्तानने जिंकली. सामन्याच्या शेवटच्या दिवशी पाहुण्या संघाला विजयासाठी 83 धावा करायच्या होत्या आणि सात विकेटस् शिल्लक होत्या. हे लक्ष्य सोपे वाटत असले तरी श्रीलंकेनेही हार न मानता पाकिस्तानच्या सहा विकेटस् मिळवल्या, मात्र 131 धावांचे लक्ष्य किती काळ टिकेल. अशाप्रकारे चार विकेटस्ने विजय मिळवत पाकिस्तानने दोन सामन्यांच्या कसोटी मालिकेत 1-0 अशी आघाडी घेतली आहे.
आता या मालिकेतील दुसरा आणि शेवटचा सामना 24 जुलैपासून म्हणजेच सोमवारपासून कोलंबोमध्ये खेळवला जाणार आहे. अशा प्रकारे, पाकिस्तानने वर्ल्ड टेस्ट चॅम्पियनशिप सायकल 2023-25 मध्ये आपले खाते उघडले आहे, त्यांचे आता 12 गुण झाले आहेत.
रोमांचक सामना (SL vs PAK)
या सामन्यात नाणेफेक जिंकल्यानंतर श्रीलंकेचा कर्णधार दिमुथ करुणारत्नेने प्रथम फलंदाजी करताना स्कोअरबोर्डवर 312 धावा केल्या होत्या. प्रत्युत्तरात पाकिस्तानने सौद शकीलच्या (208) विक्रमी द्विशतकामुळे 461 धावा केल्या. पहिल्या डावात 149 धावांनी पिछाडीवर असलेल्या श्रीलंकेला अबरार अहमद (3/68) आणि नोमान अली (3/75) या पाकिस्तानी फिरकी गोलंदाजांनी 279 धावांत गुंडाळले. पहिल्या डावात शतक झळकावणारा धनंजय डिसिल्वा (82) एकाकी झुंजला.
पाकिस्तानला 131 धावांचे लक्ष्य मिळाले, पण वळण घेणार्या खेळपट्टीवर दिवसाचा खेळ संपेपर्यंत त्यानेही 48 धावांत तीन विकेटस् गमावल्या होत्या. शेवटच्या दिवशीचा सामना रोमहर्षक होईल, अशी अपेक्षा होती, पण श्रीलंकेच्या गोलंदाजांना शक्यतो पुरेशा धावा वाचवता आल्या नाहीत.
द्विशतक झळकावणारा सऊद सामनावीर
पाकिस्तानच्या या विजयात सलामीवीर इमाम-उल-हक 50 धावा करून नाबाद राहिला. विजयासाठी 131 धावांचा पाठलाग करताना पाकिस्तानने शेवटच्या दिवसाच्या पहिल्याच सत्रात 24 धावांवर कर्णधार बाबर आझमसह आणखी 3 विकेटस् गमावल्या. मात्र, सर्फराज अहमदची विकेट गमावल्यानंतर क्रिजवर आलेला नवा फलंदाज आगा सलमानने पहिल्याच चेंडूवर षटकार ठोकून सामना संपवला. पहिल्या डावात द्विशतक झळकावणार्या सऊद शकीलला सामनावीर म्हणून गौरवण्यात आले.