लंडन : इंग्लंडविरुद्धच्या कसोटी मालिकेची सुरुवात अशा धक्कादायक रीतीने होईल, याची कल्पना खुद्द पाकिस्तान संघानेही केली नसेल. पहिल्या कसोटी सामन्याच्या पहिल्याच दिवशी, पहिल्याच चेंडूवर पाकिस्तानचा सलामीवीर अझान अवैस बाद झाला. कसोटी क्रिकेटच्या इतिहासात पाकिस्तानचा फलंदाज सामन्याच्या पहिल्याच चेंडूवर बाद होण्याची ही केवळ दुसरीच वेळ आहे. तर दुसरीकडे, इंग्लंडच्या गोलंदाजाने कसोटीच्या पहिल्या चेंडूवर बळी टिपण्याची किमया चौथ्यांदा करून दाखवली आहे.
तीन कसोटी सामन्यांच्या या मालिकेतील पहिल्या लढतीला आजपासून प्रारंभ झाला. नाणेफेक जिंकून पाकिस्तानचा संघ फलंदाजीसाठी मैदानात उतरला असता, इंग्लंडचा वेगवान गोलंदाज ऑली रॉबिन्सनने पहिल्याच चेंडूवर अझान अवैसला तंबूत धाडले. पाकिस्तानच्या बाबतीत तब्बल ४३ वर्षांनंतर या इतिहासाची पुनरावृत्ती झाली आहे. यापूर्वी १९८३ मध्ये भारताचे महान अष्टपैलू खेळाडू कपिल देव यांनी पाकिस्तानच्या मोहसिन खानला सामन्याच्या पहिल्याच चेंडूवर बाद केले होते. आता इतक्या प्रदीर्घ कालावधीनंतर पुन्हा एकदा पाकिस्तानच्या सलामीवीरावर ही नामुष्की ओढवली आहे.
सामन्याच्या पहिल्याच चेंडूवर गडी बाद करणारा ऑली रॉबिन्सन हा इंग्लंडचा चौथा गोलंदाज ठरला आहे. इंग्लंडकडून सर्वप्रथम १९२६ मध्ये मॉरिस टेट यांनी ऑस्ट्रेलियाच्या वॉरन बार्डस्ले यांना पहिल्या चेंडूवर बाद केले होते. त्यानंतर १९७४ मध्ये इंग्लंडच्या जिऑफ अर्नोल्ड यांनी भारताचे महान फलंदाज सुनील गावस्कर यांना, तर २००७ मध्ये रायन साइडबॉटम यांनी वेस्ट इंडिजच्या डॅरेन गंगाला सामन्याच्या पहिल्याच चेंडूवर तंबूत पाठवले होते. आता या विशेष यादीत ऑली रॉबिन्सनच्या नावाचाही समावेश झाला आहे.
दरम्यान, या कसोटी मालिकेसाठी बाबर आझमकडे कर्णधारपदाची धुरा सोपवण्यात आली होती; मात्र सराव सामन्यादरम्यान झालेल्या दुखापतीमुळे तो पहिल्या कसोटीतून बाहेर पडला आहे. त्याच्या अनुपस्थितीत सलमान अली आगा पाकिस्तान संघाचे नेतृत्व करत आहे. दुसऱ्या बाजूला, बेन स्टोक्सच्या निवृत्तीनंतर इंग्लंडने पुन्हा एकदा जो रूटकडे कर्णधारपदाची सूत्रे सोपवली आहेत. पाकिस्तानचा संघ नुकताच वेस्ट इंडिजविरुद्धची दोन सामन्यांची मालिका बरोबरीत सोडवून या मालिकेत उतरला आहे. त्यामुळे या तीन कसोटी सामन्यांच्या मालिकेत दोन्ही संघ कशी कामगिरी करतात, याकडे क्रिकेट विश्वाचे लक्ष लागले आहे.