Nepal Cricket Team World Record
नेपाळचा क्रिकेट संघ दिवसेंदिवस नवे विक्रम प्रस्थापित करत आहे. नेपाळच्या संघाने पुन्हा एकदा टी-२० इंटरनॅशनल (T20I) सामन्यात ३०० हून अधिक धावा ठोकण्याचा विक्रमी कामगिरी केली आहे. यासह आंतरराष्ट्रीय क्रिकेटमध्ये नेपाळने एक नवा जागतिक विक्रम आपल्या नावावर केला आहे. टी-२० क्रिकेटमध्ये आजवर कोणत्याही संघाला एकापेक्षा जास्त वेळा एकाच डावात ३०० धावा करता आलेल्या नाहीत, मात्र नेपाळने अशी कामगिरी दुसऱ्यांदा करून दाखवली आहे.
आंतरराष्ट्रीय टी-२० क्रिकेटच्या इतिहासात आतापर्यंत केवळ पाच वेळाच एखाद्या संघाने एका डावात ३०० पेक्षा जास्त धावा केल्या आहेत. विशेष म्हणजे, या पाचपैकी दोन वेळा एकट्या नेपाळच्या संघाने हा कारनामा केला आहे. याशिवाय झिम्बाब्वे, जर्मनी आणि इंग्लंड यांनी प्रत्येकी एक-एक वेळा ही कामगिरी केली आहे.
नेपाळने यापूर्वी २७ सप्टेंबर २०२३ रोजी मंगोलियाविरुद्ध ३१४ धावा केल्या होत्या. तर आता रविवार, ३१ मे २०२६ रोजी चीनविरुद्ध ३१३ धावा ठोकून नेपाळने नवा इतिहास रचला आहे. आयसीसीने (ICC) दोन देशांमधील टी-२० सामन्यांना आंतरराष्ट्रीय दर्जा दिला असल्याने हे आकडे आंतरराष्ट्रीय क्रिकेटमध्येच मोजले जातील.
एशियन गेम्स २०२६ (Asian Games 2026) चे क्वालिफायर सामने सध्या सिंगापूरमध्ये खेळवले जात आहेत. या स्पर्धेतील पहिला सामना चीन आणि नेपाळ यांच्यात झाला. या सामन्यात नेपाळच्या संघाने प्रथम फलंदाजी करताना २ गडी गमावून ३१३ धावांचा डोंगर उभा केला. प्रत्युत्तरादाखल चीनचा संघ अवघ्या ९२ धावांवर आटोपला आणि नेपाळने हा सामना २२१ धावांच्या मोठ्या फरकाने जिंकला. धावांच्या फरकाचा विचार केला, तर टी-२० आंतरराष्ट्रीय क्रिकेटमधील हा सातवा सर्वात मोठा विजय आहे; कारण यापूर्वी काही संघांनी यापेक्षाही मोठ्या फरकाने सामने जिंकले आहेत.
नेपाळच्या विजयात त्यांच्या फलंदाजांनी महत्त्वपूर्ण भूमिका बजावली. कुसल भुर्ते: याने अवघ्या ४३ चेंडूंमध्ये ५ चौकार आणि १६ षटकारांच्या मदतीने १२९ धावांची झंझावाती खेळी केली. एका डावात सर्वाधिक षटकार मारणाऱ्या फलंदाजांच्या यादीत कुसल आता संयुक्तपणे तिसऱ्या स्थानावर पोहोचला आहे. या खेळीदरम्यान त्याचा स्ट्राईक रेट ३०० चा होता. तर कुशल मल्ला याने ४७ चेंडूंमध्ये ८ चौकार आणि ५ षटकारांच्या मदतीने ८५ धावा केल्या. त्याचा स्ट्राईक रेट १८०.८५ चा होता. कर्णधार रोहितने २१ चेंडूंमध्ये ५ चौकार आणि ७ षटकारांच्या जोरावर ६९ धावांची नाबाद खेळी केली. या डावात त्याचा स्ट्राईक रेट ३२८.५७ चा होता.