लंडन; वृत्तसंस्था : टेनिस जगतातील सर्वात प्रतिष्ठेच्या ‘विम्बल्डन’ खुल्या टेनिस स्पर्धेत महिला एकेरीच्या अंतिम सामन्यात झेक प्रजासत्ताकच्या लिंडा नोस्कोव्हाने इतिहास रचला. २१ वर्षीय नोस्कोव्हाने आपल्याच देशाच्या कॅरोलिना मुचोव्हाचा ६-२, ५-७, ६-३ असा पराभव करत कारकिर्दीतील पहिल्या ग्रँडस्लॅम ट्रॉफीवर आपले नाव कोरले.
सुरुवातीला नोस्कोव्हाने पहिला सेट ६-२ असा सहज जिंकला. दुसऱ्या सेटमध्येही तिने ५-३ अशी भक्कम आघाडी घेतली होती. विजयासाठी केवळ एका गुणाची गरज असताना आणि हाताशी ५ मॅच पॉईंटस् असताना नोस्कोव्हावर दबावाचा परिणाम दिसला. मुचोव्हाने याचा फायदा उठवत सलग पाच गेम्स जिंकले आणि दुसरा सेट ७-५ असा खिशात घालत सामन्यात १-१ अशी बरोबरी साधली. मात्र, नोस्कोव्हाने तिसऱ्या निर्णायक सेटमध्ये सहाव्या मॅच पॉईंटवर उत्कृष्ट सर्व्हिस विनर मारत सामना जिंकला आणि मैदानावरच पाठ टेकवून आनंद साजरा केला.