स्पोर्ट्स

IND vs NZ 1st Test : बुमराहच्या भेदक मा-यानंतर निकोल्स-फिलिप्सचा पलटवार! पहिल्या दिवसअखेर किवी ५ बाद २४३

जीवदानाचा पुरेपूर फायदा! निकोल्स-फिलिप्सच्या १७३ धावांच्या भागीदारीने भारताची डोकेदुखी वाढवली

रणजित गायकवाड

वेलिंग्टन : बेसिन रिझर्व्ह मैदानावर गुरुवारपासून (१९ नोव्हेंबर) सुरू झालेल्या पहिल्या कसोटी सामन्यात खराब सुरुवातीनंतर न्यूझीलंडने भारताविरुद्ध जोरदार पुनरागमन केले. हेन्री निकोल्सचे शानदार शतक आणि ग्लेन फिलिप्सच्या नाबाद अर्धशतकी खेळीच्या जोरावर यजमान संघाने पहिल्या दिवसाचा खेळ संपेपर्यंत ८२ षटकांत ५ गडी गमावून २४३ धावांपर्यंत मजल मारली.

पाच बाद ७० अशा अत्यंत नाजूक अवस्थेतून सावरत या दोन्ही फलंदाजांनी सहाव्या गड्यासाठी ३२२ चेंडूंत १७३ धावांची अभेद्य भागीदारी रचून भारतीय गोलंदाजांच्या मनसुब्यांवर पाणी फेरले. दिवसाअखेर निकोल्स २२१ चेंडूंत १४ चौकारांसह ११३ धावांवर, तर फिलिप्स १८२ चेंडूंत १३ चौकारांसह ९४ धावांवर नाबाद आहेत.

तत्पूर्वी, नाणेफेक जिंकून प्रथम गोलंदाजी करण्याचा भारताचा निर्णय वेगवान गोलंदाजांनी सुरुवातीला सार्थ ठरवला. कर्णधार जसप्रीत बुमराहने डावाच्या पहिल्याच षटकातील दुसऱ्या चेंडूवर सलामीवीर टॉम लॅथमला शून्यावर त्रिफळाचीत करत भारताला पहिले यश मिळवून दिले. कसोटी कारकिर्दीत लॅथम शून्यावर बाद होण्याची ही सोळावी वेळ ठरली.

चौथ्या षटकात अंशुल कंबोजने डेव्हॉन कॉनवेला अवघ्या ४ धावांवर बाद केल्याने न्यूझीलंडची अवस्था २ बाद १२ अशी झाली. दुखापतीनंतर पुनरागमन करणारा रचिन रवींद्रही १५ धावांवर आकाश दीपच्या गोलंदाजीवर माघारी परतला, तर बुमराहने डॅरिल मिचेलला (१) तंबूचा रस्ता दाखवला. त्यामुळे उपहारापर्यंत यजमानांची अवस्था ४ बाद ६० अशी बिकट झाली होती. दुसऱ्या सत्राच्या सुरुवातीलाच बुमराहने यष्टीरक्षक टॉम ब्लंडेलला (५) बाद करत न्यूझीलंडला पाचवा धक्का दिला आणि संघ ७० धावांवर गारद होण्याची चिन्हे दिसू लागली.

मात्र, यानंतर मैदानावर आलेल्या हेन्री निकोल्स आणि ग्लेन फिलिप्स यांनी अत्यंत संयमी व जबाबदारीने फलंदाजी करत डाव सावरला. अखेरच्या सत्रात निकोल्सने आपल्या कसोटी कारकिर्दीतील बारावे आणि भारताविरुद्धचे पहिलेवहिल्या शतकाला गवसणी घातली. दुसऱ्या बाजूने फिलिप्सनेही त्याला उत्तम साथ देत शतकाच्या उंबरठ्यावर मजल मारली. विशेष म्हणजे, या दोन्ही फलंदाजांना मिळालेल्या जीवदानाचा फटका भारताला चांगलाच महागात पडला.

जसप्रीत बुमराहच्या गोलंदाजीवर फिलिप्सविरुद्ध पायचीतचे जोरदार अपील फेटाळल्यानंतर शुभमन गिलने 'डीआरएस'ची मदत घेतली; परंतु चेंडू बॅटची कड घेऊन पॅडवर आदळल्याचे तिसऱ्या पंचांच्या निदर्शनास आल्याने फिलिप्स नाबाद राहिला. तसेच, प्रसिध कृष्णाच्या एका उसळत्या चेंडूवर निकोल्सच्या बॅटची वरची कड लागून चेंडू हवेत उडाला असता, बॅकवर्ड स्क्वेअर लेगला उभा असलेला देवदत्त पडिक्कल आणि यष्टीरक्षक ऋषभ पंत या दोघांच्याही प्रयत्नांनंतर झेल सुटल्याने निकोल्सला मोठे जीवदान मिळाले. त्यानंतर तब्बल ५३.४ षटके भारतीय गोलंदाजांना एकही बळी मिळवता आला नाही.

भारतीय गोलंदाजीचा विचार करता, जसप्रीत बुमराह सर्वात यशस्वी गोलंदाज ठरला. त्याने १७ षटकांत ५२ धावा देत ३ बळी टिपले. अंशुल कंबोजने १८ षटकांत ५७ धावा देत १, तर आकाश दीपने १५ षटकांत ३३ धावा देत १ बळी घेतला. फिरकीपटू वॉशिंग्टन सुंदर आणि वेगवान गोलंदाज प्रसिध कृष्णा (१६ षटकांत ५८ धावा) यांना मात्र दिवसभरात एकही यश मिळवता आले नाही. दुसरीकडे, पहिल्या दिवशी केवळ ८२ षटकांचाच खेळ होऊ शकल्याने संथ षटकगतीची (स्लो ओव्हर रेट) टांगती तलवार भारतावर असून, जागतिक कसोटी अजिंक्यपद स्पर्धेतील (WTC) गुण कापले जाण्याची चिंता भारतीय संघ व्यवस्थापनासमोर उभी राहिली आहे.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.

SCROLL FOR NEXT