पुढारी ऑनलाईन डेस्क : कानपूर येथील दुसऱ्या कसोटीत (India vs Bangladesh 2nd Test) भारताने बांगला देशवर ७ गडी राखून विजय मिळवला. यामुळे भारताने ही कसोटी मालिका २-० ने खिशात घातली. दुसऱ्या डावात यशस्वी जैस्वालने अर्धशतकी खेळी केली. तर विराट कोहली २९ धावांवर आणि ऋषभ पंत ४ धावांवर नाबाद राहिला. कानपूर कसोटी सामन्यातील सोमवारी चौथ्या दिवशी भारतीय संघाने बांगला देशचा पहिला डाव २३३ धावांत आटोपला होता. दरम्यान, आज सोमवारी बांगला देशचा दुसरा डाव १४६ धावांवर गुंडाळला. यामुळे भारताला विजयासाठी ९५ धावांची गरज होती. हे लक्ष्य भारताने ३ गडी गमावत पूर्ण केले.
भारताने सोमवारी आपला पहिला डाव ९ बाद २८५ धावांवर घोषित केला होता. त्यानंतर सोमवारी दिवसअखेर बांगला देशने दुसऱ्या डावात २ बाद २६ धावा केल्या होत्या. आज मंगळवारी बांगला देशने दुसरा डाव २ बाद २६ धावांवरुन पुढे खेळला. पण पहिल्या सत्रात बांगला देशला एकामागोमाग एक असे धक्के बसले. यामुळे त्यांचा दुसरा डाव सर्वबाद १४६ धावांवर आटोपला. बुमराह, अश्विन आणि जडेजा यांनी प्रत्येकी ३ विकेट्स घेतल्या. तर आकाश दीपने १ विकेट घेतली. आर अश्विन याला त्याच्या शानदार अष्टपैलू कामगिरीसाठी मालिकावीर पुरस्कार मिळाला. तर कानपूरमधील दुसऱ्या कसोटीत सलग अर्धशतकी खेळी करणाऱ्या यशस्वी जैस्वालला सामनावीराचा पुरस्कार मिळाला.
१६ व्या षटकांत तैजुल इस्लामच्या चेंडूवर यशस्वी जैस्वाल ५१ धावांवर आऊट झाला. जैस्वालने ४४ चेंडूत अर्धशतकी खेळी केली.
मेहदी हसनने पाठोपाठ आणखी एक विकेट घेतली. हसनने पाचव्या षटकाच्या अखेरच्या चेंडूवर शुभमन गिलला पायचित ( Lbw) केले. यामुळे भारताची ५ षटकांत २ बाद ३५ धावा अशी अवस्था झाली.
दुसऱ्या सत्रात भारताचा दुसरा डाव सुरु होताच तिसऱ्या षटकातील पहिल्याच चेंडूवर मेहदी हसनने रोहित शर्माची विकेट घेतली. रोहित ७ चेंडूत ८ धावा काढून माघारी परतला.
बुमराहने मुशफिकूरला क्लीन बोल्ड केल्याने बांगला देशचा दुसरा डाव १४६ धावांवर गुंडाळला. बांगला देशकडे ९४ धावांची आघाडी असून भारताला विजयासाठी ९५ धावांचा गरज आहे.
बुमराहने बांगला देशला आणखी एक धक्का देत तैजुल इस्लामला पायचित केले. यामुळे ४१ षटकांत बांगला देशची अवस्था ९ बाद १३० झाली होती.
३७ व्या षटकांत बांगला देशला आठवा धक्का बसला. बुमराहच्या चेंडूवर मेहदी हसन मेराजने यष्टीरक्षक पंतकडे सोपा झेल दिला. मेहदी हसनला केवळ ९ धावा करता आल्या. यामुळे ३७ षटकांत बांगला देशची अवस्था ८ बाद ११८ धावा अशी होती.
बांगला देशला सलग चौथा धक्का बसला. जडेजाच्या फिरकीच्या जाळ्यात अडकलेल्या शाकिबने जडेजाच्या हातात सोपा झेल दिला. शाकिब अल हसन शुन्यावर बाद झाला. यामुळे बांगला देशची अवस्था ३२ षटकांत ७ बाद ९४ धावा अशी झाली होती.
३० व्या षटकांत जडेजाने बांगला देशला सहावा धक्का दिला. जडेजाने लिटन दासची विकेट घेतली. त्या झेल पंतने टिपला. सलग ३ षटकांत बांगला देशने ३ विकेट गमावल्या. यामुळे भारताने निर्णायक आघाडी घेतली.
२८ व्या षटकांच्या दुसऱ्या चेंडूवर जडेजाने नजमुल हुसैन शांतो याला क्लीन बोल्ड केले. त्यानंतर लगेच बांगला देशला पाचवा धक्का बसला. आकाश दीपने शादमान इस्लामला झेलबाद केले. जैस्वालने त्याचा झेल टिपला. शादमान इस्लामने अर्धशतकी (५० धावा) खेळी केली.
भारत आणि बांगला देश यांच्यात कानपूर येथील ग्रीन पार्क येथे सुरू असलेल्या दुसऱ्या कसोटी सामन्याच्या सोमवारी चौथ्या दिवसाचा खेळ संपला तेव्हा बांगला देशने २ बाद २६ धावा केल्या होत्या. त्यानंतर आज मंगळवारी सुरूवातीला १४ व्या षटकांत अश्विनने मोमिनूलची विकेट घेतली. राहुलने लेग स्लिपवर त्याचा झेल टिपला. यामुळे बांगला देशची अवस्था ३ बाद ४२ झाली होती.