गाल : स्टार यष्टिरक्षक-फलंदाज ऋषभ पंतचे (६६) धडाकेबाज अर्धशतक आणि त्यानंतर गोलंदाजांनी केलेल्या भेदक गोलंदाजीच्या बळावर भारताने श्रीलंकेविरुद्धच्या पहिल्या कसोटी सामन्यावर आपली पकड आणखी मजबूत केली. चौथ्या दिवसअखेरीस भारताने दिलेल्या ३७२ धावांचा पाठलाग करताना श्रीलंकेची ४ बाद ८४ अशी दयनीय अवस्था झाली असून, यजमान संघ अजूनही विजयापासून २८८ धावा दूर आहे. भारताला येथे विजयासाठी केवळ ६ बळींची आवश्यकता आहे.
या लढतीत भारताचा दुसरा डाव १९३ धावांवर आटोपला. ऋषभ पंतने अवघ्या ६९ चेंडूंत ८ चौकार, २ षटकारांसह ६६ धावांची खेळी केली. पंत व्यतिरिक्त देवदत्त पडिक्कलने ४४ आणि के. एल. राहुलने ३५ धावांचे महत्त्वपूर्ण योगदान दिले.
त्यापूर्वी, सलामीवीर यशस्वी जैस्वाल खाते उघडण्यापूर्वीच असीथा फर्नांडोच्या चेंडूवर बाद झाला. के. एल. राहुल आणि देवदत्त पडिक्कल यांनी दुसऱ्या विकेटसाठी ६५ धावांची भागीदारी रचून डाव सावरला. मात्र, राहुल (३५) आणि कर्णधार शुभमन गिल फिरकीपटू प्रभात जयसूर्याच्या फिरकीच्या जाळ्यात अडकले. पडिक्कल चांगल्या लयीत दिसत असताना ४४ धावांवर बाद झाला. त्यानंतर आलेल्या फलंदाजांनी ठराविक अंतराने विकेटस् गमावल्यामुळे भारताचा डाव १९३ धावांत आटोपला.
या लढतीत क्षेत्ररक्षण करताना दिनेश चंडीमलच्या खांद्याला आणि डोक्याला गंभीर दुखापत झाली होती. स्कॅनमध्ये ही दुखापत गंभीर नसल्याचे स्पष्ट झाल्याने त्याला दिलासा मिळाला असला, तरी तो ‘कन्कशन टेस्ट’ पास करू शकला नाही. त्यामुळे त्याच्या जागी सूरियाबंडाराला ‘कन्कशन सबस्टिट्यूट’ म्हणून संघात स्थान देण्यात आले. डावखुरा फिरकीपटू मानव सुथारने त्याला पहिल्याच चेंडूवर पायचीत केले. दिवसाचा खेळ संपला तेव्हा कर्णधार धनंजया डी सिल्व्हा ३१ आणि सोनल दिनुशा २५ धावांवर खेळत होते.
ऋषभ पंत - ८९ इनिंग्स
ॲडम गिलख्रिस्ट - १३० इनिंग्स
बेन स्टोक्स - १५१ इनिंग्स
ब्रेंडन मॅक्युलम - १७० इनिंग्स
२५१ : सेहवाग (नाबाद २०१, ५०)
२११ : पडिक्कल (१६७, नाबाद ४४)
२०४ : शिखर धवन (१९०, १४)
२०३ : सचिन तेंडुलकर (२०३)
१९२ : सौरव गांगुली (१४७, ४५)
आघाडीचा फलंदाज यशस्वी जयस्वाल कसोटीत शून्यावर बाद होण्याची ही सातवी वेळ असून २०२४ पासून एकही स्पेशालिस्ट फलंदाजावर इतक्या वेळा अशी नामुष्की आलेली नाही. केवळ बुमराह (१२), जयदेन सीलेस (१०), सिराज (९) व असिथा फर्नांडो (८) हेच या कालावधीत जयस्वालपेक्षा अधिक वेळा शून्यावर बाद झाले आहेत.