Sanju Samson ICC Player of the Month: भारतीय क्रिकेटसाठी अभिमानाची बातमी आहे. टीम इंडियाचा विकेटकीपर-बॅटर संजू सॅमसनने ICC मेन्स प्लेयर ऑफ द मंथ (मार्च) हा प्रतिष्ठेचा पुरस्कार जिंकला आहे. विशेष म्हणजे, त्याने या स्पर्धेत जसप्रीत बुमराह आणि दक्षिण आफ्रिकेचा खेळाडू कॉनर एस्टरहुइजन यांना मागे टाकलं.
संजू सॅमसनसाठी हा पुरस्कार खास आहे, कारण त्याने पहिल्यांदाच ICC प्लेयर ऑफ द मंथ अवॉर्ड जिंकला आहे. त्याच्या अलीकडच्या जबरदस्त कामगिरीचं हे मोठं फळ मानलं जात आहे.
T20 वर्ल्ड कप 2026 च्या सुरुवातीला सॅमसनला प्लेइंग XI मध्ये स्थान मिळालं नव्हतं. तो सुरुवातीचे सामने बेंचवर बसूनच पाहत होता. पण चेन्नईमध्ये झिम्बाब्वेविरुद्धच्या सुपर-8 सामन्यात त्याला संधी मिळाली आणि इथूनच त्याने धमाकेदार कमबॅक केलं.
सॅमसनने फायनलमध्ये न्यूझीलंडविरुद्ध 46 चेंडूत 89 धावांची जबरदस्त खेळी केली. त्याच्या या खेळीमुळे भारताने सलग दुसऱ्यांदा T20 वर्ल्ड कप जिंकला. संपूर्ण स्पर्धेत त्याने 5 सामन्यांत 321 धावा केल्या, आणि त्याची सरासरी तब्बल 80.2 होती.
हा पुरस्कार जिंकल्यानंतर सॅमसनने आनंद व्यक्त करत म्हटलं की, क्रिकेट कारकिर्दीतील सर्वात खास क्षणांपैकी हा एक क्षण आहे. त्याने आपल्या सहकाऱ्यांचे आणि कोचिंग स्टाफचेही आभार मानले, ज्यांच्या पाठिंब्यामुळे तो सर्वोत्तम प्रदर्शन करू शकला.
पुरुष गटासोबत महिला गटातही ICC ने पुरस्कार जाहीर केला आहे. न्यूझीलंडची स्टार ऑलराऊंडर अमेलिया केर हिने महिला प्लेयर ऑफ द मंथचा किताब जिंकला.
तिने मार्च महिन्यात 4 वनडे सामन्यांत 18 विकेट्स घेतल्या आणि 176 धावा केल्या.
झिम्बाब्वेविरुद्ध एका सामन्यात तिने 7 विकेट्स घेण्याचा पराक्रम केला.