FIFA World Cup 2026 records Gilberto Mora:
मेक्सिको सिटी: फिफा फुटबॉल विश्वचषक २०२६ च्या सलामीच्या सामन्यात मेक्सिकोच्या एस्टाडिओ अझ्टेका स्टेडियमवर एका नव्या इतिहासाची नोंद झाली. मेक्सिकोने दक्षिण आफ्रिकेचा २-० असा पराभव केला, पण या सामन्यात साऱ्या जगाचे लक्ष वेधून घेतले ते १७ वर्षांच्या गिलबर्टो मोराने. विश्वचषकाच्या मैदानात पाऊल टाकताच मोरा हा फिफा विश्वचषकात खेळणारा मेक्सिकोचा आजवरचा सर्वात तरुण खेळाडू ठरला आहे, तर जागतिक फुटबॉलच्या इतिहासातील तो सहावा सर्वात युवा खेळाडू बनला आहे.
सामन्याच्या ६५ व्या मिनिटाला जेव्हा मोराने मैदानात प्रवेश केला, तेव्हा मेक्सिको सिटीतील खचाखच भरलेल्या स्टेडियमने टाळ्यांच्या कडकडाटात त्याचे स्वागत केले. या ऐतिहासिक क्षणाचे साक्षीदार होण्यासाठी बॉक्सिंग जगतातील सुपरस्टार कॅनेलो अल्वारेझसारखे दिग्गजही स्टेडियममध्ये उपस्थित होते. अवघ्या १७ वर्षे आणि २४० दिवस वय असलेल्या मोराने तब्बल ९६ वर्षांपूर्वीचा म्हणजेच १९३० मधील पहिल्या विश्वचषकापासूनचा विक्रम मोडीत काढला.
यापूर्वी हा विक्रम मॅन्युएल रोझासच्या नावावर होता. रोझासने ९६ वर्षांपूर्वी फ्रान्सविरुद्ध खेळताना मेक्सिकोचे प्रतिनिधित्व केले होते, तेव्हा त्याचे वय १८ वर्षे आणि १३४ दिवस होते. विश्वचषकाच्या इतिहासात मोरापेक्षा लहान वयात पदार्पण करणाऱ्यांमध्ये आता केवळ पेले (१७ वर्षे २३५ दिवस), सालोमन ओलेम्बे, फेमी ओपाबुनमी, सॅम्युअल इटो आणि नॉर्दर्न आयर्लंडचा नॉर्मन व्हाइटसाइड (१७ वर्षे ४१ दिवस) या मोजक्या दिग्गजांचा समावेश आहे.
१४ ऑक्टोबर २००८ रोजी दक्षिण मेक्सिकोतील तुक्स्टला गुटीरेझ येथे जन्मलेला मोरा हा 'क्लब तिजुआना'च्या युवा अकादमीतून पुढे आला. त्याने वयाची १६ वर्षे पूर्ण होण्यापूर्वीच 'लिगा एमएक्स'मध्ये पदार्पण केले होते. आक्रमक मिडफिल्डर म्हणून खेळणाऱ्या मोराकडे खेळाची कमालीची समज, सर्जनशीलता आणि दबावाच्या परिस्थितीतही शांत राहून खेळण्याचे अफाट कौशल्य आहे. म्हणूनच वयाच्या अवघ्या १७ व्या वर्षी त्याने तिजुआना क्लबसाठी ५० हून अधिक सामने खेळले आहेत. २०२५ मध्ये चिली येथे झालेल्या फिफा अंडर-२० विश्वचषकात मेक्सिकोला उपांत्यपूर्व फेरीपर्यंत पोहोचवण्यात त्याने महत्त्वाची भूमिका बजावली होती.
मोराचा आंतरराष्ट्रीय फुटबॉलमधील प्रवास थक्क करणारा आहे. २०२५ च्या सुरुवातीला मेक्सिकोचे मुख्य प्रशिक्षक हाव्हिएर अग्युरे यांनी गोल्ड कपच्या उपांत्यपूर्व फेरीत सौदी अरेबियाविरुद्ध मोराला वरिष्ठ संघात पदार्पण करण्याची संधी दिली होती. ज्यामुळे तो मेक्सिकोच्या राष्ट्रीय संघाचे प्रतिनिधित्व करणारा सर्वात तरुण खेळाडू ठरला. त्यानंतर मोराने उपांत्य फेरीत होंडुरासविरुद्ध राहुल जिमेनेझला गोल करण्यासाठी दिलेला पास निर्णायक ठरला आणि मेक्सिकोने तो चषक जिंकला.
२०२६ च्या विश्वचषकातील तो सर्वात तरुण खेळाडू आहे. आता मेक्सिकोच्या आगामी सामन्यांमध्ये मोराने गोल केल्यास, विश्वचषकाच्या इतिहासात गोल करणारा तो जगातील दुसरा सर्वात तरुण खेळाडू ठरेल, याकडे आता क्रीडाप्रेमींचे लक्ष लागले आहे.