Virat Kohli German Model Money Offer Controversy: भारतीय क्रिकेटचा सुपरस्टार विराट कोहली बाबत जर्मन मॉडेल लिजलाजने मोठा खुलासा केला आहे. विराट कोहलीला बदनाम करण्यासाठी काही माध्यमांकडून मला पैसे ऑफर करण्यात आले होते, असा दावा तिने एका मुलाखतीत केला आहे. मात्र, आपण तो प्रस्ताव स्पष्टपणे नाकारल्याचंही तिने सांगितलं.
लिजलाजने ‘फिल्मीमंत्रा’ला दिलेल्या मुलाखतीत सांगितलं की, यावर्षीच्या सुरुवातीला विराट कोहलीने तिच्या इन्स्टाग्राम रीलला लाईक केलं होतं. त्यानंतर सोशल मीडियावर या गोष्टीची मोठी चर्चा रंगली. विराट कोहली हा जगातील सर्वाधिक फॉलो केला जाणाऱ्या क्रिकेटपटूंमध्ये अग्रस्थानी असून इन्स्टाग्रामवर त्याचे 273 मिलियनहून अधिक फॉलोअर्स आहेत. त्यामुळे त्याच्या प्रत्येक सोशल मीडिया हालचालीवर चाहत्यांचं बारकाईने लक्ष असतं.
लिजलाजने सांगितलं की, “त्या घटनेनंतर भारतातील अनेक मीडिया आउटलेट्सनी माझ्याशी संपर्क साधला. विराट कोहलीविरोधात बोलण्यासाठी आणि त्याची नकारात्मक प्रतिमा तयार करण्यासाठी मला पैशांची ऑफर देण्यात आली. पण मी ती ऑफर नाकारली, कारण विराट माझा आवडता क्रिकेटर आहे. मी कधीच त्याच्याविरोधात बोलू शकत नाही.”
तिने पुढे सांगितलं की, विराटने तिची रील लाईक केल्यावर ती भावूक झाली होती. “मला खूप आश्चर्य वाटलं आणि आनंदही झाला. इतक्या मोठ्या क्रिकेट स्टारने माझी पोस्ट पाहिली, हीच माझ्यासाठी मोठी गोष्ट होती,” असं तिने म्हटलं.
लिजलाजने विराट कोहलीचं कौतुक करताना त्याची तुलना फुटबॉल सुपरस्टार्स लिओनेल मेस्सी आणि ख्रिस्तियानो रोनाल्डो यांच्याशी केली. “विराट कोहली हा आशियाचा मेस्सी आणि रोनाल्डो आहे. त्याची लोकप्रियता, चाहतावर्ग आणि प्रभाव प्रचंड मोठा आहे. भारतात विराटशी संबंधित अगदी छोटी गोष्टही मोठी बातमी बनते,” असं ती म्हणाली.