ग्वादालाहारा; वृत्तसंस्था : फिफा विश्वचषक स्पर्धेत ‘ग्रुप के’मधील एका चुरशीच्या सामन्यात कोलंबियाने डीआर काँगोचा १-० असा पराभव केला. या विजयासह कोलंबियाने बाद फेरीतील आपले स्थान पक्के केले आहे. एस्टाडिओ ग्वादालाहारा स्टेडियमवर झालेल्या या सामन्यात क्रिस्टल पॅलेसचा स्टार खेळाडू डॅनिएल मुनोझ याने उत्तरार्धात केलेला गोल सामन्याचा टर्निंग पॉईंट ठरला.
कोलंबियाच्या संघाने गोल करण्यासाठी तब्बल २० पेक्षा अधिक सातत्याने प्रयत्न केले. मात्र, डीआर काँगोचा गोलरक्षक लायोनेल म्पासी याने गोलपोस्टसमोर भिंतीसारखे उभे राहत कोलंबियाचे अनेक प्रयत्न हाणून पाडले. म्पासीने सामन्याच्या पहिल्या २० मिनिटांतच ५ उत्कृष्ट सेव्ह्ज केले. १९९८ च्या विश्वचषकात जमैकाच्या वॉरन बॅरेटने अर्जेंटिनाविरुद्ध केलेल्या कामगिरीनंतर, पहिल्या २० मिनिटांत ५ सेव्ह्ज करणारा म्पासी हा पहिलाच गोलरक्षक ठरला.
कोलंबियाच्या सातत्यपूर्ण आक्रमणामुळे सामन्याच्या ७६ व्या मिनिटाला अखेर त्यांना यश आले. मुनोझने मारलेला एक वेगवान शॉट काँगोच्या बचावपटूला लागून (डिफ्लेक्ट होऊन) थेट जाळ्यात गेला. या गोलरक्षकाकडे हा चेंडू रोखण्यासाठी कोणतीही संधी नव्हती. या संपूर्ण स्पर्धेत मुनोझचा हा दुसरा वैयक्तिक गोल आहे.
डीआर काँगोला अद्यापही बाद फेरीत पोहोचण्याची अपेक्षा
या पराभवानंतरही डीआर काँगोचे स्पर्धेतील आव्हान अद्याप संपलेले नाही. रविवारी होणाऱ्या सामन्यात जर त्यांनी उझबेकिस्तानचा पराभव केला, तर तेही बाद फेरीत प्रवेश करू शकतात. विशेष म्हणजे, काँगोने आपल्या गटात तिसरे स्थान मिळवले आणि दुसऱ्या गटात थॉमस टुचेल यांच्या मार्गदर्शनाखालील इंग्लंडचा संघ अव्वल राहिला, तर अंतिम ३२ च्या फेरीत इंग्लंड आणि डीआर काँगो आमनेसामने येऊ शकतात.