'रामायण' चित्रपटात रावणाची भूमिका साकारणारा अभिनेता यश याने पात्रासाठी केलेल्या तयारीबाबत महत्त्वाचा खुलासा केला आहे. रावण हा भगवान शिवाचा निस्सीम भक्त असल्याने शूटिंगदरम्यान यशने स्वतःला त्या भूमिकेसाठी काय काय केले, याबद्दल खुलासा केला आहे.
अभिनेता यश सध्या दिग्दर्शक नितेश तिवारी यांच्या'रामायण' चित्रपटामुळे चर्चेत आहे. या चित्रपटात तो रावणाची भूमिका साकारत असून, या भूमिकेसाठी त्याने घेतलेल्या मेहनतीचा एक रंजक किस्सा नुकताच समोर आला आहे. पात्राशी पूर्णपणे एकरूप होण्यासाठी यशने केलेली तयारी सध्या सोशल मीडियावर चर्चेचा विषय ठरली आहे.
'रामायण' चित्रपटातील रावणाच्या भूमिकेसाठी अभिनेता यशने केलेली तयारी सध्या चर्चेचा विषय ठरली आहे. सॅन डिएगो कॉमिक-कॉनमध्ये रणबीर कपूर, दिग्दर्शक नितेश तिवारी आणि निर्माता नमित मल्होत्रा यांच्यासोबत उपस्थित असताना यशने चित्रपटाच्या शूटिंग दरम्यान घडलेला एक खास पडद्यामागचा अनुभव चाहत्यांसोबत शेअर केला.
रावणाच्या व्यक्तिरेखेत पूर्णपणे समरस होण्यासाठी आपण सेटवर स्वतःसाठी वेगळे वातावरण तयार करत असल्याचे यशने सांगितले. "मी सेटवरील संपूर्ण वातावरण बदलून टाकायचो. त्या काळात मी खूप गंभीर असायचो आणि पूर्णपणे माझ्या पात्रातच जगत होतो," असे तो म्हणाला.
यशने पुढे सांगितले की, भूमिकेचा प्रभाव टिकवून ठेवण्यासाठी तो सेटवर मोठे स्पीकर्स घेऊन जायचा आणि त्यावर मोठ्या आवाजात संगीत वाजवत असे. "मी नेहमी शिवभक्तीची गाणी लावायचो. रावण हा भगवान शिवाचा परम भक्त होता. त्यामुळे त्या भक्तीभावात आणि मानसिक अवस्थेत राहणे माझ्यासाठी आवश्यक होते. संगीत इतके मोठ्या आवाजात सुरू असायचे की इतरांना माझ्याशी बोलण्यासाठीही खूप प्रयत्न करावे लागायचे."
चित्रपटात भगवान रामाची भूमिका साकारणारा रणबीर कपूरही या चर्चेत सहभागी झाला. त्याने सांगितले की, त्यांचे आणि यशचे अद्याप एकत्र चित्रीकरण झाले नसले तरी सेटवरील इतर सदस्यांकडून त्याने यशच्या तयारीबद्दल बरेच ऐकले आहे. "यशच्या संगीतामुळे सेटवरील ऊर्जा पूर्णपणे बदलून जायची, असे अनेकांनी मला सांगितले," असे रणबीरने नमूद केले.
कधी रिलीज होणार 'रामायण'?
भगवान राम यांच्या भूमिकेत रणबीर कपूर, माता सीताच्या भूमिकेत साई पल्लवी आणि यश रावणाच्या भूमिकेत असणार आहे. रामायण हा चित्रपट दिवाळीला रिलीज होईल.
कधी रिलीज होणार 'रामायण'चे ट्रेलर?
नितेश तिवारी दिग्दर्शित बहुचर्चित 'रामायण' चित्रपटाच्या ट्रेलरबाबत नवी माहिती समोर येत आहे. सुरुवातीला या चित्रपटाचा अधिकृत ट्रेलर २४ जुलै रोजी रिलीज होणार असल्याची चर्चा होती. मात्र, काही अनपेक्षित कारणांमुळे निर्मात्यांनी तो नियोजित तारखेला रिलीज न करण्याचा निर्णय घेतल्याचे सांगितले जात आहे.
मिळालेल्या माहितीनुसार, सोनी पिक्चर्ससोबतच्या भागीदारीशी संबंधित नियोजनामुळे ट्रेलरची तारीख पुढे ढकलण्यात आली. 'रामायण'चा ट्रेलर आता ३० जुलै रोजी रिलीज केला जाऊ शकतो. विशेष म्हणजे, याच दिवशी भारतात 'स्पायडर-मॅन: ब्रँड न्यू डे' रिलीज होत असल्याने मोठा प्रेक्षक वर्गापर्यंत पोहोचण्यासाठी निर्माते ही तारीख निवडू शकतात, असे म्हटले जात आहे.