अर्जुन कपूरसोबत लंडनमध्ये दिसल्यानंतर अभिनेत्री साहिबा बाली पुन्हा एकदा चर्चेत आली आहे. सोशल मीडियावरील लोकप्रिय चेहरा असलेली साहिबा ही अभिनेत्री, कंटेंट क्रिएटर आणि माजी कॉर्पोरेट प्रोफेशनल आहे. समय रैनासोबत तिचे नाव यापूर्वी चर्चेत आले होते. अभिनयासोबतच ब्रँड मार्केटिंगमध्येही काम केलेल्या साहिबाने अनेक वेब सीरिज आणि चित्रपटांमधून आपली वेगळी ओळख निर्माण केली आहे.
पुढारी ऑनलाईन डेस्क - बॉलिवूड अभिनेता अर्जुन कपूर आणि अभिनेत्री साहिबा बाली यांचा लंडनमधील एक फोटो सध्या सोशल मीडियावर चांगलाच चर्चेत आहे. दोघे एकत्र दिसल्यानंतर त्यांच्या नात्याबाबत विविध चर्चा रंगू लागल्या. मात्र, साहिबा बालीने या सर्व अफवा स्पष्ट शब्दांत फेटाळून लावत कोणतेही रिलेशनशिप नसल्याचे सांगितले. त्यामुळे आता अनेकांना प्रश्न पडला आहे की, साहिबा बाली नेमकी आहे तरी कोण?
लॉर्ड्सवरील उपस्थितीमुळे चर्चेला उधाण
१९ जुलै २०२६ रोजी भारत आणि इंग्लंड यांच्यात लॉर्ड्स क्रिकेट मैदानावर झालेल्या तिसऱ्या एकदिवसीय सामन्यावेळी अर्जुन कपूर आणि साहिबा बाली एकत्र दिसले. सामन्यादरम्यानचे त्यांचे फोटो सोशल मीडियावर मोठ्या प्रमाणात व्हायरल झाले. त्यानंतर दोघांच्या डेटिंगच्या चर्चा सुरू झाल्या. मात्र, साहिबाने त्या केवळ अफवा असल्याचे स्पष्ट केले.
समय रैनासोबतही झाले होते नाव जोडले
अर्जुन कपूरपूर्वी साहिबा बालीचे नाव कॉमेडियन समय रैना याच्यासोबतही चर्चेत आले होते. सोशल मीडिया पोस्ट, सार्वजनिक कार्यक्रम आणि समान मित्रमंडळींमुळे दोघे अनेकदा एकत्र दिसत होते. त्यामुळे त्यांच्या मैत्रीबाबत अनेक तर्क-वितर्क लावले गेले. मात्र, त्या चर्चांनाही कधीच अधिकृत दुजोरा मिळाला नाही.
काश्मिरी कुटुंबातील साहिबाचा शिक्षण प्रवास
५ डिसेंबर १९९४ रोजी जन्मलेल्या साहिबा बाली मूळची काश्मिरी कुटुंबातील आहे. दिल्ली विद्यापीठातून तिने अर्थशास्त्राची पदवी घेतली. त्यानंतर उच्च शिक्षणासाठी लंडनला गेली. तेथे मार्केटिंगचे शिक्षण घेतले आणि ऑक्सफर्ड विद्यापीठातील बिझनेस प्रोग्राममध्येही सहभाग घेतला.
अभिनयापूर्वी कॉर्पोरेट क्षेत्रात काम
चित्रपटसृष्टीत येण्यापूर्वी साहिबाने कॉर्पोरेट क्षेत्रातही काम केले आहे. काही काळ झोमॅटोमध्ये मार्केटिंग विभागात कार्यरत होत्या. डिजिटल मार्केटिंग आणि ब्रँडिंग क्षेत्रातील अनुभव घेतल्यानंतर तिने मनोरंजन क्षेत्रात पाऊल टाकले.
इम्तियाज अलींमुळे मिळाली पहिली संधी
लंडनमध्ये शिक्षण घेत असताना दिग्दर्शक इम्तियाज अली यांच्या टीमकडून त्यांना ऑडिशनसाठी संपर्क करण्यात आला. त्यानंतर 'लैला मजनू' चित्रपटात महत्त्वाची भूमिका साकारण्याची संधी तिला मिळाली. तिला लैला मजनूमध्ये मुख्य अभिनेत्रीच्या बहिणीची भूमिका मिळाली. ती नेटफ्लिक्सच्या 'बार्ड ऑफ ब्लड' (२०१९) मध्ये आबिदाच्या भूमिकेत दिसली आणि 'अमर सिंह चमकीला'मध्ये एका पत्रकाराची भूमिका साकारली होती.
OTT आणि चित्रपटांमध्येही ठसा
साहिबा बाली नेटफ्लिक्सवरील 'बार्ड ऑफ ब्लड' या मालिकेत आबिदा या भूमिकेत झळकली. त्यानंतर 'अमर सिंह चमकीला' या चित्रपटात तिने पत्रकाराची भूमिका साकारली. अभिनयासोबतच डिजिटल कंटेंट, ब्रँड कॅम्पेन आणि सोशल मीडिया क्षेत्रातही तिने स्वतःची वेगळी ओळख निर्माण केली आहे.