पुढारी ऑनलाईन
हॉलीवूडचा बहुप्रतीक्षित चित्रपट 'द बॅटमॅन'चा (the batman) दुसरा ट्रेलर आता प्रदर्शित झाला असून, यात बॅटमॅन आणि कॅट वूमनची दमदार अ‍ॅक्शन पाहायला मिळाली आहे. अभिनेता रॉबर्ट पॅटिन्सन बॅटमॅन तथा ब्रुस वेन हे कॅरेक्टर साकारले आहे. यावेळी चित्रपटात ब्रुस वेनचे तत्त्वज्ञान थोडे बदललेले दिसेल.
बॅटमॅन हे मूळचे डीसी कॉमिक्समधील एक पात्र आहे. बॅटमॅनचे चित्रपट ही अशी फ्रँचाईजी आहे. जी इतर सर्व सुपरहिरोजपेक्षा वेगळी आणि खास आहे. खरेतर ख्रिस्तोफर नोलन दिग्दर्शित 'द डार्क नाईट' या बॅटमॅन त्रयीने जगभरातील प्रेक्षकांवर मोहिनी घातली आहे.
हॉलीवूडमधील सार्वकालिक व्हिलन्सपैकी एक 'जोकर'च्या याच त्रयीतील व्हर्जनची चर्चा आजही होते. ही भूमिका दिवंगत हिथ लेजर या अभिनेत्याने साकारली होती. तर अभिनेता ख्रिस्तियन बेल याने साकारलेल्या ब्रुस वेन तथा बॅटमॅनचाही स्वतंत्र फॅनबेस जगभरात आहे.
या चित्रपटांनी बॅटमॅनच्या चित्रपटांचा एक बेंचमार्क सेट केला आहे. त्यामुळेच आता नव्या 'द बॅटमॅन'कडूनही प्रेक्षकांना मोठी अपेक्षा आहे. तथापि, या चित्रपटाच्या ट्रेलरमधून दिसते की चित्रपटात काळ्या रंगाचा वापर जास्त आहे. अनेक भारतीयांना तो पचनी पडत नसला तरी डीसी कॉमिक्सच्या फॅन्सना असेच डार्क चित्रपट आवडतात.
मॅट रिव्हज दिग्दर्शित या चित्रपटत ज्यो क्रावित्झ, जेफ्री राईट, जॉन टुरटुरो, पॉल डानो, पीटर सरसागर्ड यांच्या भूमिका असून, हा चित्रपट 4 मार्च 2022 रोजी प्रदर्शित होत आहे.