दाक्षिणात्य अभिनेत्री सामंथा रुथ प्रभू हिने तामिळनाडूचे मुख्यमंत्री विजय यांची भेट घेतल्यानंतर सोशल मीडियावर एक प्रेरणादायी पोस्ट शेअर केली आहे. “तुमचे आयुष्य तुम्ही पाहिलेल्या स्वप्नापेक्षाही कितीतरी भव्य असू शकतं,” असा संदेश देत तिने विजय यांच्या नेतृत्वगुणांचे आणि व्यक्तिमत्त्वाचे कौतुक केले. सामंथाच्या या पोस्टने चाहत्यांचे लक्ष वेधून घेतले असून सोशल मीडियावर तिची मोठ्या प्रमाणात चर्चा होत आहे.
Samantha Prabhu on Chandrasekaran Joseph Vijay
दाक्षिणात्य चित्रपटसृष्टीतील लोकप्रिय अभिनेत्री सामंथा रुथ प्रभू पुन्हा एकदा चर्चेत आली आहे. मात्र यावेळी कारण तिचा आगामी चित्रपट किंवा ग्लॅमरस फोटोशूट नसून तिने सोशल मीडियावर केलेली एक खास पोस्ट आहे. तामिळनाडूचे मुख्यमंत्री विजय यांची भेट घेतल्यानंतर सामंथाने शेअर केलेला संदेश सध्या सोशल मीडियावर मोठ्या प्रमाणात व्हायरल होत आहे.
सामंथाने तिच्या अधिकृत सोशल मीडिया अकाउंटवर मुख्यमंत्री विजय यांच्यासोबतचा एक फोटो शेअर करत भावनिक आणि प्रेरणादायी शब्दांत भावना व्यक्त केल्या. “तुमचे आयुष्य तुम्ही पाहिलेल्या स्वप्नापेक्षाही कितीतरी भव्य असू शकतं,” असे ती आपल्या पोस्टमध्ये म्हणाली. या एका वाक्यानेच चाहत्यांचे आणि नेटकऱ्यांचे लक्ष वेधून घेतले.
पोस्टमध्ये सामंथाने विजय यांच्या प्रवासाचा आणि त्यांच्या नेतृत्वगुणांचा उल्लेख केल्याचे दिसून येते. चित्रपटसृष्टीत सुपरस्टार म्हणून लोकप्रियता मिळवल्यानंतर सार्वजनिक जीवनात प्रवेश करून राज्याचे नेतृत्व करण्यापर्यंतचा त्यांचा प्रवास अनेकांसाठी प्रेरणादायी असल्याचे मत तिने व्यक्त केले आहे.
सामंथाने आपल्या इन्स्टा पोस्टमध्ये काय लिहिलं?
''आज मी चेन्नईमध्ये उतरले तेव्हा मनात एक वेगळीच उत्सुकता आणि आनंद होता, कारण मी आमच्या मुख्यमंत्र्यांना भेटण्यासाठी जात होते. विजय सरांविषयी मला नेहमीच असे वाटत आले आहे की ते फक्त चित्रपटातील नायक म्हणून मर्यादित राहण्यासाठी निर्माण झालेले नाहीत. त्यांची उर्जा, व्यक्तिमत्त्व आणि लोकांकडून मिळणारा अपार प्रतिसाद पाहिला की ते काहीतरी मोठ्या हेतूसाठीच पुढे येत आहेत, असे जाणवत राहते. एखाद्या पूर्णपणे नवीन क्षेत्रात पाऊल ठेवण्यासाठी लागणारे धैर्य मला सर्वाधिक प्रेरणा देते. ज्या क्षेत्रात आपण आधीच यश मिळवले आहे ते मागे सोडून, अधिक मोठ्या आव्हानांचा स्वीकार करणे हे सोपे नसते; ते केवळ जोखमीसाठी नाही, तर काहीतरी सकारात्मक बदल घडवण्याच्या विश्वासातून केले जाते.
माझ्या मते, प्रत्येकाच्या आयुष्यात असा एक टप्पा येतो जेव्हा त्याला स्वतःच्या मर्यादेपलीकडे जाऊन काहीतरी अधिक मोठे करण्याची हाक ऐकू येते. त्या वेळी आपण समाजासाठी काय योगदान देऊ शकतो याचा विचार होतो, पण फार थोडे लोक त्या हाकेला प्रत्यक्ष प्रतिसाद देतात. मला खात्री आहे की विजय सर अशा लोकांनाही आश्चर्यचकित करतील जे आधीच त्यांच्यावर विश्वास ठेवतात. हे केवळ पदासाठी नाही, तर त्यांच्या उद्देश, समर्पण आणि दृष्टीकोनामुळे घडणार आहे. या प्रवासात त्यांना सातत्य, शहाणपण आणि धैर्य मिळो हीच शुभेच्छा. आणि हे वाचणाऱ्या प्रत्येक तरुणासाठी ही एक आठवण ठरो की तुमचं आयुष्य तुम्ही सुरुवातीला पाहिलेल्या स्वप्नांपेक्षा कितीतरी अधिक मोठं आणि अर्थपूर्ण असू शकतं.''
Kaththi (2014), Theri (2016), Mersal (2017) या तिन्ही चित्रपटांमध्ये सामंथा आणि विजय दोघेही मुख्य भूमिकेत दिसले आहेत आणि त्यांची जोडी प्रेक्षकांमध्ये खूप लोकप्रिय झाली होती.