Sai Pallavi
नवी दिल्ली: दाक्षिणात्य अभिनेत्री साई पल्लवी सध्या ‘रामायण’ चित्रपटातील सीतामाईच्या भूमिकेमुळे चर्चेत आहे. नुकतेच ‘कौन बनेगा करोडपती १८’ या कार्यक्रमात चित्रपटाच्या प्रमोशनसाठी आलेल्या साई पल्लवीने आपल्या भावी जोडीदाराबद्दलच्या अपेक्षा सांगितल्या. महागड्या भेटवस्तू, मोठमोठ्या गप्पा किंवा दिखावा यापेक्षा जोडीदाराचा स्वभाव, विचार आणि वागणूक तिच्यासाठी अधिक महत्त्वाची असल्याचे तिने स्पष्ट केले.
मनाने चांगला असणारा, स्वतःच्या चुका मान्य करणारा आणि त्या सुधारण्याची तयारी ठेवणारा व्यक्ती तिला जोडीदार म्हणून हवा आहे. विशेष म्हणजे, भावी जोडीदाराला स्वयंपाक करता येत असेल, तर ती त्याच्यासाठी अतिरिक्त जमेची बाजू ठरेल, असेही तिने सांगितले.
१. मनाने चांगला असावा, केवळ स्वतःचाच विचार करणारा नसावा
कोणत्याही नात्यात एकमेकांची काळजी घेणे सर्वांत महत्त्वाचे असते. एखादी व्यक्ती प्रत्येक वेळी केवळ स्वतःचा आनंद, स्वतःच्या गरजा आणि स्वतःचे म्हणणे यांनाच प्राधान्य देत असेल, तर नात्यात दुरावा निर्माण होऊ शकतो.
साई पल्लवीला तिचा भावी जोडीदार मनाने चांगला आणि समजूतदार असावा असे वाटते. त्याने केवळ स्वतःच्या आनंदाचा विचार न करता समोरच्या व्यक्तीच्या भावनांचाही आदर करावा. नात्यात दोघांच्याही गरजा आणि भावना महत्त्वाच्या असतात, याची जाणीव त्याला असावी.
प्रत्येक व्यक्तीमध्ये काही चांगले गुण असतात, तर काही सवयी सुधारण्याची गरज असते. मात्र, चांगल्या जोडीदाराची ओळख म्हणजे त्याला स्वतःमधील कमतरता समजतात आणि त्या दूर करण्याची त्याची तयारी असते.
साई पल्लवीला असा जोडीदार हवा आहे, ज्याला स्वतःच्या स्वभावाची आणि वागण्याची पूर्ण जाणीव असेल. आपल्या एखाद्या सवयीचा इतरांवर काय परिणाम होतो, हे त्याला समजायला हवे. स्वतःमध्ये काही बदल करण्याची गरज असल्याचे लक्षात आल्यास तो त्यासाठी प्रयत्न करणारा असावा.
कोणत्याही नात्यात कधी ना कधी मतभेद किंवा वाद होणे स्वाभाविक आहे. अनेकदा अगदी छोट्या कारणांवरूनही दोघांमध्ये नाराजी निर्माण होते. अशा वेळी एकमेकांचे म्हणणे ऐकून घेणे आणि समजून घेणे महत्त्वाचे असते.
साई पल्लवीच्या मते, तिचा जोडीदार स्वतःच्या चुकीची जबाबदारी स्वीकारणारा असावा. आपल्याकडून चूक झाली असेल, तर ती मान्य करण्याची त्याची तयारी असावी. प्रत्येक वेळी स्वतःची चूक दुसऱ्यावर ढकलणे किंवा आपणच बरोबर असल्याचे सिद्ध करण्याचा प्रयत्न करणे नात्यासाठी नुकसानकारक ठरू शकते.
साई पल्लवीच्या अपेक्षांच्या यादीतील आणखी एक रंजक गोष्ट म्हणजे स्वयंपाकाची आवड आणि कौशल्य! भावी जोडीदाराला स्वयंपाक करता येत असेल, तर ती चांगली गोष्ट असेल, असे तिने हसत सांगितले.
ऐकायला ही छोटी अपेक्षा वाटत असली, तरी दैनंदिन आयुष्यात तिचे महत्त्व मोठे आहे. घरातील कामांमध्ये दोघांनीही एकमेकांना मदत केली, तर सर्व जबाबदारी एकाच व्यक्तीवर पडत नाही. शिवाय, एकत्र काम करताना दोघांनाही एकमेकांसोबत वेळ घालवण्याची संधी मिळते.
साई पल्लवीच्या बोलण्यातून एक गोष्ट स्पष्ट होते की, आयुष्याचा जोडीदार निवडताना केवळ व्यक्तीचे दिसणे, आकर्षण किंवा मोठमोठ्या गोष्टींना महत्त्व देऊन चालत नाही. त्या व्यक्तीचा स्वभाव, विचार करण्याची पद्धत आणि इतरांशी वागण्याची वृत्तीही तितकीच महत्त्वाची असते. दीर्घकाळ टिकणाऱ्या नात्यासाठी विश्वास, एकमेकांना समजून घेण्याची वृत्ती आणि परस्परांचा आदर या गोष्टी आवश्यक असतात. तुमचे म्हणणे ऐकून घेणारा, तुमच्या भावनांची कदर करणारा आणि स्वतःच्या चुका सुधारण्याचा प्रयत्न करणारा जोडीदार असेल, तर नाते अधिक घट्ट आणि आनंदी होऊ शकते.