Asha Bhosle Raj Thackeray Tribute: ज्येष्ठ गायिका आशा भोसले यांच्या निधनाने भारतीय संगीतविश्वावर शोककळा पसरली आहे. त्यांच्या निधनानंतर विविध क्षेत्रांतून श्रद्धांजली वाहिली जात असताना महाराष्ट्र नवनिर्माण सेनेचे अध्यक्ष राज ठाकरे यांनी भावनिक शब्दांत त्यांना आदरांजली अर्पण केली आहे.
राज ठाकरे यांनी आपल्या श्रद्धांजली संदेशात आशा भोसले यांना “दि लास्ट एम्परर” असे संबोधत त्यांच्या संगीत प्रवासाचे वर्णन केले. त्यांनी लता मंगेशकर आणि आशा भोसले यांची तुलना जागतिक कलाकार लिओनार्डो दा विंची आणि मायकलॅन्जलो यांच्याशी केली.
त्यांच्या मते, लता मंगेशकर यांच्या आवाजात परफेक्शन, स्थैर्य आणि आध्यात्मिकता होती, तर आशा भोसले यांच्या गायनात नजाकत, आवेग, धिटाई आणि बंडखोरीचा सुर होता. “पिया तू अब तो आजा”, “आईये मेहरबान”, “दम मारो दम” यांसारख्या गाण्यांमधून आशाताईंच्या आवाजातील विविध पैलू प्रकट होत असल्याचे त्यांनी नमूद केले.
राज ठाकरे यांनी आशा भोसले यांच्या आयुष्याचा प्रवासही अधोरेखित केला. लहान वयातच कुटुंबाची जबाबदारी सांभाळताना त्यांनी अनेक संकटांचा सामना केला, पण त्या कधीही खचल्या नाहीत. उलट, त्या संघर्षातूनच त्यांच्या आवाजातली ताकद आणि भावनिक खोली अधिक प्रगल्भ होत गेली, असे त्यांनी सांगितले.
त्यांनी पुढे म्हटले की, लता मंगेशकर आणि आशा भोसले या दोन्ही बहिणींनी भारतीय चित्रपट संगीताला एक नवं रूप दिलं. त्यांच्या मते, या दोघींनी मिळून भारतीय संगीताच्या ‘रेनेसाँस’ युगाला आकार दिला. “काही वर्षांपूर्वी लतादीदी गेल्या आणि आज आशाताईही आपल्यातून निघून गेल्या. भारतीय संगीताच्या सुवर्णकाळाचा शेवटचा महत्त्वाचा अध्याय आज संपला,” अशा शब्दांत त्यांनी भावना व्यक्त केल्या.
राज ठाकरे यांनी शेवटी म्हटले की, अशा महान कलाकारांनी देशाच्या भावविश्वाला दिशा दिली, आणि त्यांच्यामुळेच समाजात संवेदनशीलता टिकून राहिली. “आशाताईंचा आवाज आणि त्यांचा अलौकिक प्रवास कायम आपल्या सोबत राहील,” असे सांगत त्यांनी त्यांना विनम्र श्रद्धांजली अर्पण केली.