पुढारी ऑनलाईन डेस्क : आपल्या अदाकारीने आणि अभिनयाने चाहत्यांना भुरळ घालणार्या अभिनेत्री अमृता खानविलकर. (Amruta Khanvilkar) तिचा लवकरचं चंद्रमुखी हा मराठी चित्रपट प्रदर्शित होतोय. नुकतीच ती फिल्मफेअरच्या पेजवर झळकणारी पहिली मराठमोळी अभिनेत्री ठरली आहे. हा चित्रपट मराठी कादंबरीकार विश्वास पाटील यांच्या चंद्रमुखी (Chandramukhi) या बहुचर्चित कादंबरीवर आहे.
Chandramukhi अमृताने आपल्या इन्स्टाग्राम अकाउंटवर अभिनेता, दिग्दर्शक प्रसाद ओकला टॅग करत एक पोस्ट शेअर केली आहे. तिने या पाेस्टमध्ये म्हटलं आहे की, माझ्या दिग्दर्शकाला (प्रसाद ओक) ला सगळं ओरिजिनल हवं होतं. तेव्हा "अमृता नाक टोचायचं, क्लिप वाल्या नथी मी तुला घालू देणार नाही" असं त्यांनी पहिल्याच मीटिंगमध्ये सांगितलं. म्हणूनच अशा पद्धतीने मी अडीच वर्षांपूर्वीच नाक टोचलं. त्या नंतरही ते बुजलं, दुखलं मग परत टोचावं लगलं; पण शूटिंग पर्यंत नथ आणि माझी जुगलबंदी सुरूच राहिली. खऱ्या सोन्याच्या नथीं केल्या तेव्हा नाचताना त्या इतक्या जड होत असत की पॅकअप नंतर त्या वरचं रक्त आधी कोमट पाण्याने आम्ही काढायचो आणि मग नाथ काढायचो" असं लिहीत तिने आपल्या चाहत्यांना प्रश्न केला आहे की, "चंद्राची कुठली नथ तुम्हाला जास्त आवडली ओ ?"
अमृताने चंद्रमुखी या मराठी चित्रपटात ढोलकीचा ताल, घुंगरांचे बोल आणि साजशृंगार, सौंदर्याची नजाकत आणि सोबत दिलखेचक अदांनी सर्वांना घायाळ करणारी नृत्यांगनेची भूमिका केली आहे. आदीनाथ कोठारे (Adinath Kothare) हा दोैलत देशमानेच्या भुमिकेत दिसणार आहे. या चित्रपटाचे दिग्दर्शन अभिनेता प्रसाद ओक, पटकथा-संवाद चिन्मय मांडलेकर तर चित्रपटाला अजय -अतुल यांचे संगीत लाभले आहे.