पुढारी ऑनलाईन: पुणे- मुंबई हायवे लगत असलेली एक मोठी होर्डिंग वादळी वाऱ्यामुळे कोसळली आहे. या घटनेत सहा जणांचा मृत्यू तर तीन जण जखमी झाल्याची प्राथमिक माहिती समोर येत आहे. ही घटना पिंपरी चिंचवडमधील किवळे (रावेत) येथे सहाच्या सुमारास घडली.
पिंपरी चिंचवड शहरामध्ये सोमवारी सायंकाळी अचानक वादळी वाऱ्यासह जोरदार पावसाने हजेरी लावली.अचानक आलेल्या जोरदार पावसामुळे काही नागरिकांनी होर्डिंगच्या जवळ असलेल्या पंक्चरच्या दुकानात आश्रय घेतला होता. वादळामुळे या दुकानावर होर्डिंग कोसळल्याने सहा जणांचा दुर्दैवी मृत्यू झाला आहे.
स्थानिक पोलीस, प्रशासन आणि अग्निशमन विभागाकडून क्रेनच्या साह्याने होर्डिंग बाजूला करण्याचं काम सुरु आहे. या होर्डिंगच्या ढिगाऱ्याखाली आणखी काही लोक अडकून पडल्याची भीती वर्तवली जात आहे.
वरिष्ठ पोलीस निरीक्षक शिवाजी गवारी यांनी दिलेल्या माहितीनुसार, सायंकाळी किवळे येथे होर्डिंग पडल्याची माहिती मिळाली. त्यानुसार रावेत पोलिसांनी घटनास्थळी दाखल होऊन कटरच्या साह्याने होर्डिंग तोडले. तसेच जेसीबीच्या सहाय्याने होर्डिंग बाजूला करून जखमींना नजीकच्या रुग्णालयात दाखल केले. यातील सहाजण दगवल्याची प्राथमिक माहिती आहे.