लंडन : आपले प्रेम व्यक्त करून लग्नाचा प्रस्ताव समोर ठेवण्यासाठी काही हौशी प्रेमवीर भन्नाट प्रकार करीत असतात. कुणी यासाठी समुद्रकिनारा निवडतं, कुणी हॉट एअर बलूनमध्ये तर कुणी चक्क स्टेडियममध्येही प्रेयसीला प्रपोज करते. आता ब्रिटनमधील एका प्रियकराने त्याच्या प्रेयसीला चक्क पाण्याखाली प्रपोज केलं, तेही शार्क माशांच्या गराड्यात!
ब्रिटनमधील या तरुणाने शार्क माशांच्या जवळ जाऊन प्रेयसीला प्रपोज केलं. विशेष म्हणजे त्याच्या गर्लफ्रेंडला शार्क खूप आवडतात. त्यामुळे त्याने पाण्याखाली शार्क मासे आजूबाजूला असताना प्रेयसीला प्रपोज केलं आहे. ही अनोखी घटना ब्रिटनमधील लिंकनशायर येथील स्केग्नेस ॲक्वॅरियममध्ये घडली. बकिंघमशायर येथील जेम्स वॉल्श आणि त्याची गर्लफ्रेंड पेगी कूक हे शार्कसोबत ड्रायव्हिंगचा अनुभव घेण्यासाठी गेली होती. त्याच वेळी जेम्सने पेगीला सरप्राइज देण्याचे ठरवले आणि १० सप्टेंबरला पाण्याखाली त्याने लग्नासाठी असे प्रपोज केले. जेम्सने हा प्लॅन अचानक केला नव्हता. त्याने प्रपोज करण्याआधीच ॲक्वॅरियमच्या प्रशासनाशी संपर्क साधला आणि प्लॅन तयार केला.
पाण्याखाली समोर एक खास बोर्ड ठेवला. त्यावर ‘वुईल यू मॅरी मी?’ असे लिहिले होते. तिने आश्चर्याने स्कूबा मास्कवर हात ठेवला आणि नंतर हाताच्या इशाऱ्याने होकारही दिला. त्यानंतर दोघांनी पाण्याखालीच एकमेकांना मिठी मारली आणि रिंगही घातली. जेम्सने प्रपोज करण्यासाठी हीच जागा का निवडली, यामागेही खास कारण आहे. पेगीला शार्क अतिशय आवडतात आणि तिला शार्कसोबत स्कूबा डायव्हिंग करण्याची इच्छा होती. त्यामुळे तिच्या आवडीच्या प्राण्यांच्या मध्येच तिला प्रपोज करण्याचा जेम्सने निर्णय घेतला.