मॉस्को : भारताच्या 'चांद्रयान-3' नंतर आता रशियाने आपल्या चांद्रमोहिमेची तयारी केली आहे. रशियाच्या एका अधिकार्याने सोमवारी सांगितले की 11 ऑगस्टला रशिया आपल्या चांद्रमोहिमेच्या पार्श्वभूमीवर एक गाव रिकामे करणार आहे. तब्बल अर्धशतकानंतर पुन्हा एकदा चांद्रमोहीम राबवण्यासाठी रशिया उत्सुक झालेला आहे. या मोहिमेला 'लूना-25' असे नाव देण्यात आले आहे. 1976 नंतर प्रथमच रशियाचे मून लँडर चांद्रभूमीकडे झेपावेल.
वोस्तोचन कोस्मोड्रोममधून 'लूना-25' चे लाँचिंग होईल. हे ठिकाण मॉस्कोपासून सुमारे 5,550 किलोमीटरवर पूर्वेला आहे. रशियाची अंतराळ संशोधन संस्था 'रॉसकॉसमॉस'कडूनही त्याची पुष्टी झाली आहे. या संस्थेने म्हटले आहे की आग्नेय रशियातील खाबरोवस्क क्षेत्रातील शख्तिस्की गाव सुरक्षेच्या कारणासाठी 11 ऑगस्टला सकाळी रिकामे केले जाईल. हे गाव अशा अनुमानित क्षेत्रात येते जिथे वेगळे झाल्यानंतर रॉकेट बूस्टर कोसळण्याची शक्यता आहे. खाबरोवस्क क्षेत्रातील वेरखनेबुरिंस्की जिल्ह्याचे प्रमुख एलेक्सी मास्लोव यांनी सांगितले की उमाल्टा, उस्सामख, लेपिकन, तस्ताख तसेच सागनार व बुरेया नदीचा काठ या क्षेत्रात येतो.
'लूना-25' हे सोयूज-2 फ्रीगेट बूस्टरने लाँच होईल आणि चंद्राच्या दक्षिण ध्रुवावर लँड होईल. या मोहिमेचा उद्देश सॉफ्ट-लँडिंगचे तंत्रज्ञान विकसित करणे, चंद्राच्या अंतर्गत संरचनेबाबत संशोधन करणे आणि चांद्रभूमीवर पाण्यासह अन्य घटकांचा शोध घेणे हा आहे. यापूर्वी सन 1976 मध्ये 'लूना-24' लाँच करण्यात आले होते. रिटर्न मॉड्यूलने चंद्रावरील सुमारे 170 ग्रॅम धुळीचे नमुने आणले होते.