पुणे; पुढारी वृत्तसेवा : हर्ष नवे, पर्व नवे, नव्या इच्छा-आकांक्षा…नवीन वर्ष घेऊनी आले नवी स्वप्नांची दुनिया…असे म्हणत पुणेकर नवीन वर्षाचे स्वागत करण्यासाठी सज्ज आहेत. सरत्या वर्षाला निरोप देत नवीन वर्षाचे जंगी स्वागत होणार असून, शनिवारी (दि.31) रात्री दहानंतर पुणे शहरासह, पिंपरी-चिंचवड आणि जिल्ह्याच्या ग्रामीण भागातील हॉटेल्स, रेस्टॉरंट, रिसॉर्ट अन् विविध क्लबमध्ये न्यू इअर पार्टी रंगणार आहे. त्यासाठी हाऊसफुल्ल बुकिंग झाली आहे.
विविध खाद्यपदार्थांचा आस्वाद घेत अन् लाइव्ह म्युझिक बॅण्ड अन् डीजेच्या तालावर थिरकत नवीन वर्षाचे स्वागत होणार आहे. पुण्यातील रस्ते विद्युत रोषणाईने उजळले आहे. कोरोनामुळे दोन वर्षे नववर्षाचे स्वागत साधेपणाने झाले. पण, यंदा नव्या वर्षाचे स्वागत जल्लोषात, जोशात होणार आहे. शनिवारी रात्री दहानंतर या पार्टी सुरू होणार असून, यंदा परवानगी मिळाल्यामुळे पार्टी रात्रभर चालणार आहेत. त्यासाठीचे नियोजनही हॉटेल्स-रेस्टॉरंट मालकांनी केले आहे. काहींनी नवीन वर्षासाठी घरांमध्ये पार्टीचे नियोजन केले आहे.
घराघरांत विविध खाद्यपदार्थांचा आस्वाद घेत संगीताचे कार्यक्रम आणि कुटुंबीयांसमवेत पार्टीचा आनंद घेणार आहेत, तर काहींनी कुटुंबीयांसोबत मुळशी, लोनावळा, पानशेत आदी ठिकाणे गाठली आहेत. तरुणाईने मित्र-मैत्रिणींबरोबर पबमध्ये जाऊन नववर्षाचे स्वागत करण्याचे ठरविले आहे. पुण्यातील मॉलमध्येही नवीन वर्षाचे वातावरण पाहायला मिळत असून, खास सजावटही केली आहे. कॅम्प, कोरेगाव पार्क, विमाननगर, औंध आदी ठिकाणच्या मॉलमध्ये न्यू इअर सेलिब्रेशन मूड पाहायला मिळत आहे.
हॉटेल्स-रेस्टॉरंटमध्ये खास सजावट नवीन वर्षानिमित्ताने पुण्यातील हॉटेल्स, रेस्टॉरंट, पब, क्लब हाऊस अन् रिसॉर्टने विद्युत रोषणाईने उजळली आहेत. येथे खास सजावटही करण्यात आली आहे. तर रस्त्यांनाही वेगळे रूप प्राप्त झाले आहे. विविध रंगांची फुले, विद्युत रोषणाई अन् 'हॅप्पी न्यू इअर'चे फलक लावलेले पाहायला मिळत आहेत. खासकरून कॅम्प, फर्ग्युसन महाविद्यालय रस्ता अन् डेक्कन परिसरात नवीन वर्षाचे जल्लोषी वातावरण पाहायला मिळत आहे.
यंदा हॉटेल्स, रेस्टॉरंट, पब, क्लब हाऊस अन् रिसॉर्टमध्ये चांगली बुकिंग झाली आहे. ते हाऊसफुल्ल आहेत. येथे विविध थीमनुसार न्यू इअर पार्टी आयोजित केली असून, सर्वच ठिकाणी लाइव्ह म्युझिक बँड, डीजे नाइट, सुफी-गझल नाइटसह विविध खाद्यपदार्थांसह विविध उपक्रमांचे आयोजन केले असून, रात्री बारा वाजता खास पद्धतीने नवीन वर्षाचे स्वागत होणार आहे. खाद्यपदार्थांच्या पार्सललाही मोठी मागणी आहे. हॉटेल्स, रेस्टॉरंट, पब, क्लब हाऊस अन् रिसॉर्टने वेगवेगळ्या सवलतीही देण्यात आल्या आहेत.
– किशोर सरपोतदार,
अध्यक्ष, पुणे रेस्टॉरंटस
खास सजावट
नवीन वर्षानिमित्ताने पुण्यातील हॉटेल्स, रेस्टॉरंट, पब, क्लब हाऊस अन् रिसॉर्टने विद्युत रोषणाईने उजळली आहेत. येथे खास सजावटही करण्यात आली आहे. तर रस्त्यांनाही वेगळे रूप प्राप्त झाले आहे. विविध रंगांची फुले, विद्युत रोषणाई अन् 'हॅप्पी न्यू इअर'चे फलक लावलेले पाहायला मिळत आहेत. खासकरून कॅम्प, फर्ग्युसन महाविद्यालय रस्ता अन् डेक्कन परिसरात नवीन वर्षाचे जल्लोषी वातावरण पाहायला मिळत आहे.
या ठिकाणी रंगणार न्यू इअर पार्टी….
डेक्कन परिसर, कोरेगाव पार्क, जंगली महाराज रस्ता, कॅम्प, विमाननगर, हिंजवडी, बाणेर, बावधन, फर्ग्युसन रस्ता, प्रभात रस्ता, कोथरूड, औंध आदी ठिकाणच्या हॉटेल्स, रेस्टॉरंट, पबमध्ये मोठ्या प्रमाणात बुकिंग झाली आहे. याशिवाय पुणे शहराजवळ असलेल्या पिंपरी तसेच ग्रामीण भागातील रिसॉर्टमध्ये न्यू इअर पार्टीत डीजे सादरीकरण, बिर्याणीसह विविध खाद्यपदार्थांची मेजवानी अन् विविध गेम्स…असे काहीशी तयारी करण्यात आली आहे.