पवनानगर : पवन मावळ विभागातील ठाकूरसाई येथील कुबेर व्हिला बंगल्याच्या माळी रूममध्ये दारूच्या नशेत मित्राने आईवरून शिवीगाळ केल्याच्या रागातून शिवीगाळ करणार्या मित्राचा कुदळीने डोक्यात घाव घालून खून केल्याची धक्कादायक घटना घडली आहे. याप्रकरणी लोणावळा ग्रामीण ठाण्यात खुनाचा गुन्हा दाखल केला आहे.
मयताचे नाव दिनेश लक्ष्मण गरवड (वय 36, रा. भाजे, ता. मावळ) असे असून, फिर्यादी ज्ञानेश्वर लक्ष्मण गरवड (वय 40, रा. भाजे, ता. मावळ) यांनी दिलेल्या माहितीनुसार, प्रणव विश्वजीत डेका (वय 18, रा. चव्हाणनगर, वडगाव मावळ) याच्या विरोधात गुन्हा दाखल केला असून, त्याला पोलिसांनी ताब्यात घेतले आहे. 3 जुलै रोजी रात्री 12:30 वाजताच्या सुमारास कुबेर व्हीला, ठाकूरसाई येथील बंगल्यातील माळी रूममध्ये ही घटना घडली. आरोपी व मयत दोघेही त्या बंगल्यात माळीकाम करत होते. दरम्यान, दारूच्या नशेत मयत दिनेश गरवड याने आरोपी प्रणव डेका याला आईवरून शिवीगाळ केल्याचा राग मानत ठेवून प्रणवने कुदळीने दिनेशच्या डोक्यावर वार केला. यात त्याचा मृत्यू झाला. मयताचा मृतदेह उत्तरीय तपासणीसाठी पाठविण्यात आला आहे. प्राथमिक तपासात आरोपी प्रणव डेका याला अटक करण्यात आली आहे.