पिंपरी : पुढारी वृत्तसेवा
चंद्रपूर जिल्ह्यातील वाईन शॉपचे लायसन्स ट्रान्सफर करून देण्याच्या बहाण्याने महिलेची ४० लाख रुपयांची फसवणूक करण्यात आली. हा प्रकार १ सप्टेंबर ते ६ ऑक्टोबर या कालावधीत तळेगाव दाभाडे येथे घडला.
याप्रकरणी ५६ वर्षीय महिलेने तळेगाव दाभाडे पोलीस ठाण्यात फिर्याद दिली आहे. त्यानुसार, विनायक शंकर रामगुडे, पराग शंकर रामगुडे आणि एक महिला यांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, आरोपींनी त्यांची मंत्रालयात ओळख असल्याचे फिर्यादी यांना भासवले.
चंद्रपूर जिल्ह्यात दारूबंदी असून तेथील वाईन शॉपचे लायसन्स ट्रान्सफर करून फिर्यादी महिलेच्या नावावर करून देतो, असे सांगण्यात आले. त्यासाठी महिलेकडून ४० लाख रुपये घेतले. त्यानंतर लायसन्स न देता रक्कम परत करण्यासाठी न वटणारे धनादेश दिले.
तसेच, सातारा येथील एका सदनिकेची खोटी विसार पावती लिहून दिली. लायसन्ससाठी पैसे घेऊन ते परत न करता तसेच लायसन्स न देता फसवणूक केल्याने गुन्हा दाखल करण्यात आला आहे. तळेगाव दाभाडे पोलिस तपास करीत आहेत.