रेशन दुकानांमध्ये आयुष्मान कार्डसाठी गर्दी

पिंपरी: शहरातील रास्त भाव धान्य दुकानांमध्ये आयुष्मान कार्ड काढण्यासाठी नागरिकांची गर्दी होत आहे. राज्य शासनाच्या सूचनेनुसार अन्नधान्य वितरण कार्यालयांतर्गत (पुणे) हे कार्ड काढण्यात येत आहेत. पिंपरी-चिंचवड महापालिकेच्या आशा सेविकांच्या माध्यमातून हे कार्ड काढले जात आहेत.

आयुष्मान भारत कार्डचे लाभार्थी हे रेशन दुकानांतून धान्य घेणारे लाभार्थी आहेत. धान्य वितरण करताना जी प्रणाली अवलंबली जाते, त्याच प्रणालीने आयुष्मान कार्ड काढण्याची प्रक्रिया पूर्ण केली जाते. त्यामुळे कार्ड काढण्यासाठी ही प्रक्रिया पूर्ण केल्यानंतर पुढील 24 तासांमध्ये कार्ड अपडेट होऊन त्याची प्रिंट कार्डधारकाला घेता येते. त्याबाबतचा मेसेज कार्डधारकांना मोबाईलवर पाठविला जातो.

ई-सेवा केंद्रांमध्येदेखील ही सुविधा सुरू आहे. मात्र, गेल्या वर्षापासून शहरातील 317 रास्त भाव धान्य दुकानांमध्येदेखील ही कार्यवाही सुरू केली आहे. दरम्यान, चालू वर्षात गेल्या रविवारपासून (दि. 9) रेशनकार्ड दुकानांमध्ये हे कार्ड काढण्याचे काम सुरू झाले आहे. त्यासाठी रेशन दुकानांमध्ये गर्दी होत आहे. ज्या नागरिकांनी आयुष्मान कार्ड काढले आहे, त्या नागरिकांना 5 लाख रुपयांपर्यंतचे आरोग्य विमा संरक्षण मिळते. नोंदणीकृत रुग्णालयांमध्ये त्यांना त्याबाबतची सुविधा दिली जात आहे.