पिंपरी: महामेट्रोकडून निगडी ते पिंपरी या मार्गावरील मेट्रो मार्गिकेचे काम सुरू आहे. काम करताना निगडी येथील टिळक चौकातील बस थांबा येथील पिंपरी-चिंचवड महापालिकेची जलवाहिनी फुटली. त्यामुळे लाखो लिटर पाणी वाया गेले. ती घटना बुधवारी (दि.11) सायंकाळी घडली. राज्यातील दुष्काळ परिस्थितीत अशा प्रकारे पिण्याचे पाणी वाया गेल्याने नागरिकांकडून संताप व्यक्त केले जात आहे.
महामेट्रोकडून स्टेशनच्या पिलरसाठी खोदकाम सुरू आहे. जेसीबीद्वारे खोदकाम सुरू असताना अचानक जलवाहिनी फुटली. त्यात चौकात रस्त्यावर पाणीच पाणी झाले. त्यामुळे वाहतूक कोंडीत भर पडली. त्या पाण्यातून नागरिकांना ये-जा करावी लागली. त्याचा नागरिकांसह प्रवाशांना त्रास सहन करावा लागला. त्यात लाखो लिटर पाणी वाया गेले.
महामेट्रोच्या ठेकेदाराच्या निष्काळजीपणामुळे ही घटना घडली आहे. काम करताना योग्य ती काळजी न घेतल्यामुळे पाण्याची नाहक नासाडी झाली आहे. या पूर्वी चार ते पाच वेळा जलाहिनी फुटण्याचे प्रकार घडले आहेत. त्यासंदर्भात महापालिकेच्या पाणीपुरवठा विभागाने महामेट्रोला नोटीसही बजावली आहे.
मात्र, मेट्रोच्या कामात सुधारणा झालेली नसल्याने नागरिकांकडून संताप व्यक्त करण्यात येत आहे. ही बाब महापालिकेच्या पाणीपुरवठा विभागास समजताच त्यांनी त्या वाहिनीतून पाणीपुरवठा बंद केला. त्यानंतर दुरूस्ती काम हाती घेण्यात आले. ते काम दुसर्‍या दिवशी गुरूवारी (दि.12) सकाळी पूर्ण झाले.