पिंपरी: पिंपरीतील डॉ. डी. वाय. पाटील विद्यापीठ (अभिमत विद्यापीठ) येथे बुधवारी (दि. १२) माजी राज्यपाल आणि डॉ. डी. वाय. पाटील शिक्षण समूहाचे संस्थापक पद्मश्री डॉ. डी. वाय. पाटील (दादा) यांना विविध क्षेत्रांतील मान्यवरांनी शोकसभेत श्रद्धांजली अर्पण केली. तसेच, त्यांच्या आठवणींना उजाळा दिला.
पद्मश्री डॉ. डी. वाय. पाटील (दादा) यांच्या निधनाने शिक्षणविश्वावर तीव्र शोककळा पसरली असून, एका महान युगाचा अंत झाला आहे. ज्ञान, संस्कार, दूरदृष्टी आणि मानवतेचा अखंड दीप प्रज्वलित ठेवणारे एक थोर शिक्षणमहर्षी म्हणून दादा ओळखले जात.
त्यांच्या निधनाने शैक्षणिक व सामाजिक क्षेत्राची कधीही भरून न निघणारी हानी झाली आहे. पद्मश्री डॉ. डी. वाय. पाटील यांनी केवळ शैक्षणिक संस्थांचे जाळे उभे केले नाही, तर लाखो विद्यार्थ्यांच्या स्वप्नांना आकार दिला. नैतिक मूल्यांची जोपासना केली आणि शिक्षणाला खऱ्या अर्थाने समाजपरिवर्तनाचे प्रभावी माध्यम बनवले. त्यांचे दूरदर्शी नेतृत्व, साधेपणा, मानवतावादी दृष्टिकोन आणि शिक्षणाप्रती असलेली अखंड निष्ठा येणाऱ्या अनेक पिढ्यांसाठी सदैव मार्गदर्शक ठरेल, अशा शब्दांत उपस्थितांनी श्रद्धांजली अर्पण केली.
याप्रसंगी डॉ. डी. वाय. पाटील विद्यापीठाचे कुलपती डॉ. पी. डी. पाटील, डॉ. डी. वाय. पाटील विद्यापीठाच्या प्र-कुलपती व ज्ञान प्रसाद ग्लोबल युनिव्हर्सिटीच्या कुलपती व अध्यक्षा डॉ. भाग्यश्री पी. पाटील, डी. वाय. पाटील एज्युकेशन सोसायटी (अभिमत विद्यापीठ) कोल्हापूरचे कुलपती व अध्यक्ष डॉ. संजय डी. पाटील, डी. वाय. पाटील एज्युकेशन सोसायटीचे उपाध्यक्ष व आमदार सतेज डी. पाटील, ज्ञान प्रसाद ग्लोबल युनिव्हर्सिटीचे प्र-कुलपती व डॉ. डी. वाय. पाटील युनिटेक सोसायटीचे सचिव डॉ. सोमनाथ पी. पाटील, डॉ. डी. वाय. पाटील विद्यापीठाच्या प्र-कुलगुरू व डॉ. डी. वाय. पाटील विद्यापीठ सोसायटीच्या सचिव डॉ. स्मिता जाधव, डॉ. डी. वाय. पाटील विद्यापीठ सोसायटी, पुणेचे विश्वस्त व खजिनदार डॉ. यशराज पी. पाटील यांच्यासह पाटील परिवारातील सदस्यांनी उपस्थितांच्या सांत्वनपर भेटींचा स्वीकार केला.
या शोकसभेला दैनिक ‘पुढारी’चे चेअरमन आणि समूह संपादक डॉ. योगेश जाधव, आयुक्त डॉ. विजय सूर्यवंशी, महापौर रवि लांडगे, माजी महापौर योगेश बहल, माजी आमदार विलास लांडे, बीव्हीजी कंपनीचे हणमंत गायकवाड, अपर पोलिस महासंचालक कृष्णप्रकाश तसेच शैक्षणिक, औद्योगिक, राजकीय, साहित्यिक, सामाजिक, क्रीडा, कृषी, अध्यात्मिक, शासकीय व वैद्यकीय क्षेत्रांसह शिक्षण समूहातील प्राध्यापक, अधिकारी, कर्मचारी व विद्यार्थी मोठ्या संख्येने उपस्थित होते.
या वेळी संपूर्ण विद्यापीठ सभागृह शोकाकुल वातावरणात बुडून गेले होते. उपस्थितांनी दादांच्या आठवणींना उजाळा देत त्यांच्या पवित्र स्मृतीस अभिवादन केले. उपस्थितांनी दोन मिनिटे मौन पाळून शोक व्यक्त केला. त्यानंतर पवित्र गीता पठण, प्रार्थना आणि दादांच्या जीवनप्रवासावर आधारित भावस्पर्शी चित्रफीत दाखवली जात असताना सभागृहातील वातावरण पूर्णपणे गहिवरून गेले होते.
दादा हे केवळ एका शैक्षणिक समूहाचे संस्थापक नव्हते, तर आम्हा सर्वांचे भक्कम आधारस्तंभ आणि मार्गदर्शक होते. शिक्षणातून समाजविकास हा त्यांनी दिलेला मंत्र आणि त्यांनी जपलेली मूल्ये हीच आमची खरी पुंजी आहे. त्यांनी उभारलेला हा ज्ञानाचा वटवृक्ष असाच बहरत ठेवणे आणि त्यांनी दाखवलेल्या मार्गावर निष्ठेने चालणे, हीच त्यांना दिलेली खरी आणि श्रद्धांजली ठरेल.- डॉ. पी. डी. पाटील, कुलपती, डॉ. डी. वाय. पाटील विद्यापीठ, पिंपरी
दादांचे संपूर्ण आयुष्य हे मानवता, वात्सल्य आणि निरंतर सेवेचे प्रतीक होते. समाजातील शेवटच्या घटकापर्यंत शिक्षणाची गंगा पोहोचावी, ही त्यांची धडपड असायची. त्यांची तीच दूरदृष्टी, साधेपणा आणि आपुलकी आजही आपल्या सर्वांच्या मनात जिवंत आहे. दादांचे विचार आणि त्यांचे आशीर्वाद कायम आपल्या पाठीशी राहतील.- डॉ. भाग्यश्री पी. पाटील, प्र-कुलपती, डॉ. डी. वाय. पाटील विद्यापीठ व अध्यक्षा, ज्ञान प्रसाद ग्लोबल युनिव्हर्सिटी