नवी दिल्ली; वृत्तसंस्था : केंद्र सरकारने स्पष्ट केले आहे की, सिम बाईंडिंगचे नियम लागू करण्याची 28 फेब्रुवारीची अंतिम मुदत वाढवली जाणार नाही. नवीन नियमांनुसार फोनमध्ये सिमकार्ड नसल्यास व्हॉटस्अॅपसारखे मेसेजिंग अॅप काम करणार नाहीत. कॉम्प्युटरवर लॉगिन केलेले व्हॉटस्अॅपदेखील 6 तासांत लॉगआऊट होईल.
जेव्हा तुम्ही एखाद्या अॅपला सिम बाईंडिंगशी जोडता, तेव्हा ते अॅप तेव्हाच उघडेल जेव्हा तुमचे नोंदणीकृत सिमकार्ड त्याच फोनमध्ये असेल. हा नियम 1 मार्च 2026 पासून लागू होईल. केंद्रीय संचार मंत्री ज्योतिरादित्य सिंधिया यांनी सांगितले की, सध्या नियमांचे पालन करण्याची मुदत वाढवण्यावर कोणताही विचार नाही. ते म्हणाले की, हे नियम राष्ट्रीय सुरक्षा आणि फसवणूक रोखण्यासाठी लागू करण्यात आले आहेत आणि सुरक्षेच्या मुद्द्यांवर सरकार कोणतीही तडजोड करणार नाही. यूजर्सना हे सुनिश्चित करावे लागेल की त्यांचे व्हॉटस्अॅप ज्या नंबरवर आहे, ते सिम त्याच फोनमध्ये असावे. जर सिमकार्ड फोनमधून काढले तर मेसेजिंग अॅप काम करणे बंद करू शकते.
इंडस्ट्री असोसिएशनने सरकारला इशारा दिला आहे की, दर 6 तासांनी लॉगआऊट करण्याचा नियम कामासाठी व्हॉटस्अॅप वेबवर अवलंबून असलेल्या प्रोफेशनल्ससाठी त्रासदायक ठरेल. तसेच एकाच अकाऊंटचा वापर करणार्या कुटुंबांनाही अडचणी येतील. केंद्र सरकारच्या आदेशानुसार, कंपन्यांना 120 दिवसांच्या आत याबाबत अहवाल सादर करावा लागेल. नियमांचे पालन न केल्यास दूरसंचार कायदा 2023, दूरसंचार सायबर सुरक्षा नियम आणि इतर लागू कायद्यांनुसार कारवाई केली जाईल.
सिम बाईंडिंग एक सुरक्षा कवच आहे. हे तुमच्या मेसेजिंग अॅपला तुमच्या फिजिकल सिमकार्डसोबत लॉक करते. याचा सर्वात मोठा फायदा हा आहे की, कोणताही हॅकर किंवा ठग तुमच्या नंबरचा वापर दुसर्या कोणत्याही डिव्हाईसवर बसून करू शकणार नाही.