The Great Khali Car Accident Health Update: ‘द ग्रेट खली’ अर्थात प्रसिद्ध रेसलर दिलीप सिंह यांचा २९ ऑगस्ट २०२६ रोजी हरियाणातील पानिपत येथे कार अपघात झाला. टोल प्लाझाजवळ खली यांची एसयूव्ही एका कारला धडकली. या अपघाताचा व्हिडीओ सोशल मीडियावर मोठ्या प्रमाणात व्हायरल झाल्यानंतर त्यांच्या प्रकृतीबाबत चाहत्यांमध्ये चिंता निर्माण झाली होती. मात्र, आता स्वतः खली यांनी सोशल मीडियावर व्हिडीओ शेअर करत आपल्या प्रकृतीची माहिती दिली आहे.
अपघातानंतर खली सुखरूप असून त्यांच्या प्रकृतीला कोणताही गंभीर धोका नसल्याचे त्यांनी स्पष्ट केले आहे. सोशल मीडियावर शेअर केलेल्या व्हिडीओमध्ये त्यांनी चाहत्यांचे आभार मानत आपण पूर्णपणे ठीक असल्याचे सांगितले.
खली म्हणाले की, अपघातानंतर त्यांच्या तब्येतीची विचारपूस करण्यासाठी अनेक फोन आणि मेसेज आले. मात्र, हा केवळ किरकोळ अपघात होता. परंतु अपघाताचा व्हिडीओ सोशल मीडियावर व्हायरल झाल्याने चाहत्यांना वस्तुस्थिती सांगणे आवश्यक असल्याचे त्यांनी म्हटले.
अपघातानंतर समोर आलेल्या व्हिडीओमध्ये एका पांढऱ्या रंगाच्या कारचा पुढील भाग कोसळलेला दिसत आहे. तर दुसऱ्या बाजूला खली हे अपघाताच्या ठिकाणी चालताना दिसत आहेत. त्यानंतर ते एका काळ्या रंगाच्या स्कॉर्पिओमध्ये बसताना दिसतात.
व्हिडीओमध्ये खली स्वतः चालत गाडीकडे जाताना दिसत असल्याने त्यांना गंभीर दुखापत झालेली नसल्याचे स्पष्ट झाले. या व्हिडीओनंतरही चाहत्यांमध्ये त्यांच्या प्रकृतीबाबत चिंता होती. त्यामुळे खली यांनी स्वतः व्हिडीओ शेअर करून आपण सुरक्षित असल्याचे सांगितले.
आपल्या हेल्थ अपडेटमध्ये खली यांनी हा अपघात किरकोळ असल्याचे सांगितले. तसेच चाहत्यांचे प्रेम, आशीर्वाद आणि देवाची कृपा यामुळे आपण सुरक्षित असल्याचे त्यांनी म्हटले. शेवटी त्यांनी चाहत्यांना स्वतःची काळजी घेण्याचा सल्ला देत ‘जय हिंद’ असे म्हणत व्हिडीओचा शेवट केला.
द ग्रेट खली यांनी रेसलिंगच्या रिंगमध्ये आपल्या दमदार कामगिरीने जगभरात ओळख निर्माण केली. त्याशिवाय त्यांनी मनोरंजन क्षेत्रातही काम केले आहे. ‘बिग बॉस ४’मध्ये ते स्पर्धक म्हणून सहभागी झाले होते आणि या पर्वाचे ते रनर-अप ठरले होते. या पर्वाची विजेती अभिनेत्री श्वेता तिवारी होती.
खली यांनी २००५ मध्ये ‘द लॉन्गेस्ट यार्ड’ या चित्रपटातून अभिनय क्षेत्रात पदार्पण केले. त्यानंतर ‘गेट स्मार्ट’, ‘मॅकग्रुबर’, ‘कुश्ती’, ‘रामा: द सेवियर’ यांसह अनेक चित्रपटांमध्ये त्यांनी भूमिका साकारल्या. २०२३ मध्ये ते बांगलादेशी थ्रिलर चित्रपट ‘MR-9: डू ऑर डाय’मध्येही दिसले होते.