चेन्नई; वृत्तसंस्था : तमिळ सुपरस्टार अभिनेता थलपती विजय यांना त्यांच्या तमिळगा वेत्री कझगम (टीव्हीके) चे 2026 तामिळनाडू विधानसभा निवडणुकीसाठी मुख्यमंत्रिपदाचे उमेदवार म्हणून घोषित करण्यात आले.
बुधवारी महाबलीपूरम मधील हॉटेलमध्ये झालेल्या पक्षाच्या बैठकात विजय यांना निवडणुकीसाठीचे पूर्ण अधिकारही दिले गेले. करूर येथील चेंगराचेंगरीनंतर कार्यकर्त्यांना संबोधित करण्याची विजय यांची ही पहिली सार्वजनिक सभा होती. विजय म्हणाले की, 2026 च्या निवडणुकीत सामना फक्त टीव्हीके आणि सत्ताधारी डीएमके यांच्यातच होईल आणि टीव्हीके निश्चितपणे यश मिळवेल. करूर रॅलीदरम्यान 27 सप्टेंबरला झालेल्या चेंगराचेंगरीत 41 लोकांचा मृत्यू आणि 60 पेक्षा जास्त जखमी झाले होते.
थलपती विजय यांचा राजकीय प्रवास
विजयने फेब्रुवारी २०२४ मध्ये टीव्हीके लाँच केले होते, ज्यामुळे राजकीय क्षेत्रात लक्षणीय लक्ष वेधले गेले. त्यांचा चाहता गट, विजय मक्कल इयाक्कम, २०२१ च्या स्थानिक स्वराज्य संस्थांच्या निवडणुकीत ११५ जागा जिंकून आधीच आपला ठसा उमटवला होता. थलपती विजय यांनी सांगितले की टीव्हीके २०२४ च्या लोकसभा निवडणुका लढवणार नाही, त्याऐवजी २०२६ मध्ये होणाऱ्या तामिळनाडू विधानसभा निवडणुकीवर लक्ष केंद्रित करण्याचा पर्याय निवडला. त्यांनी पक्षाचे प्राथमिक ध्येय राज्यात "मूलभूत राजकीय बदल" आणणे हे आहे यावर भर दिला.