saurav das ashutosh ranka delhi police crime branch summons
नवी दिल्ली : पुढारी ऑनलाईन सौरव दास, अजिंक्य शिंदे आणि आशुतोष रांका यांना दिल्ली पोलिसांचे समन्स; आज दुपारी १२ वाजता चौकशीसाठी हजर राहण्याचे आदेश देण्यात आले आहेत.
दिल्ली पोलिसांच्या गुन्हे शाखेने सौरव दास, अजिंक्य शिंदे आणि आशुतोष रांका यांना समन्स बजावले आहे. जबाब नोंदवण्यासाठी आज दुपारी १२ वाजता राजौरी गार्डन येथील गुन्हे शाखेच्या कार्यालयात हजर राहण्याचे निर्देश देण्यात आले आहेत.
सीजेपी नेते सौरव दास, आशुतोष रांका आणि अजिंक्य शिंदे यांच्या अडचणी कमी होण्याचे नाव घेत नाहीत. दिल्ली पोलिसांच्या गुन्हे शाखेने त्यांना समन्स बजावले आहे. पोलिसांनी त्यांना आपले जबाब नोंदवण्यासाठी आज गुन्हे शाखेसमोर हजर राहण्याचे निर्देश दिले आहेत.
आज दुपारी १२ वाजता त्यांना राजौरी गार्डन येथील गुन्हे शाखेच्या कार्यालयात उपस्थित राहावे लागणार आहे. तेथे त्यांच्याकडे या प्रकरणाशी संबंधित विविध मुद्द्यांवर चौकशी केली जाणार असून, त्यांचे जबाब नोंदवले जाणार आहेत. या कायदेशीर कारवाईनंतर त्यांच्या अडचणी आणखी वाढताना दिसत आहेत.
यापूर्वी बुधवारी विशेष कार्यकारी दंडाधिकाऱ्यांच्या न्यायालयाने रांका आणि सौरव यांना प्रत्येकी ५० हजार रुपयांच्या वैयक्तिक हमीपत्रावर आणि जामीनपत्रावर तिहार तुरुंगातून मुक्त करण्याचे आदेश दिले होते. न्यायालयात दोन्ही नेत्यांनी लेखी प्रतिज्ञापत्र सादर केले होते. जोपर्यंत जंतर-मंतर परिसर डी-नोटिफाईड राहील, तोपर्यंत ते तेथे शांतता भंग करणार नाहीत किंवा कोणत्याही आंदोलनाचे आवाहन करणार नाहीत, असे त्यांनी या प्रतिज्ञापत्रात नमूद केले होते.
बुधवारी झाली होती सुटका
दिल्ली पोलिसांनी त्यांच्या न्यायालयीन कोठडीत आणखी तीन दिवसांची वाढ करण्याची मागणी केली होती. त्यांच्या जबाबांमध्ये विसंगती असून, कायदा आणि सुव्यवस्थेची परिस्थिती बिघडू शकते, असा युक्तिवाद पोलिसांनी केला होता. मात्र, त्यांच्या वकिलांनी बिनशर्त माफी मागितल्याने आणि दिलेल्या आश्वासनांचा विचार करून दंडाधिकाऱ्यांनी त्यांना आणखी कोठडीत ठेवण्याची आवश्यकता नसल्याचे स्पष्ट केले. या प्रकरणाची पुढील सुनावणी २३ ऑक्टोबर रोजी दुपारी ३ वाजता होणार आहे.
दोन्ही नेत्यांच्या सुटकेचे सीजेपीचे संस्थापक अभिजीत दिपके आणि कायदेशीर विभागाच्या प्रमुख रत्ना सिंह यांनी स्वागत केले. तसेच आम आदमी पक्षाचे राष्ट्रीय संयोजक अरविंद केजरीवाल यांनीही न्यायालयाच्या निर्णयाचे स्वागत करत संपूर्ण देश त्यांच्या पाठीशी उभा असल्याचे म्हटले.
दरम्यान, भाजपचे राष्ट्रीय प्रवक्ते संबित पात्रा यांनी स्पष्ट केले की, दोन्ही नेत्यांना तिरंगा फडकवल्यामुळे ताब्यात घेण्यात आले नव्हते, तर शांतता हमीपत्राचे (पीस बॉन्ड) उल्लंघन केल्यामुळे त्यांच्यावर ही कारवाई करण्यात आली होती.
१४ ऑक्टोबर रोजी घेतले होते ताब्यात
सौरव दास आणि आशुतोष रांका यांना १४ ऑक्टोबर रोजी पार्लियामेंट स्ट्रीट पोलीस ठाण्याच्या पोलिसांनी भारतीय नागरिक सुरक्षा संहितेच्या कलम १२६ आणि १७० अंतर्गत प्रतिबंधात्मक कारवाई म्हणून ताब्यात घेतले होते.
त्यांच्यावर आरोप होता की, त्यांनी प्रतिबंधित आणि डी-नोटिफाईड घोषित करण्यात आलेल्या जंतर-मंतर आंदोलनस्थळी परवानगीशिवाय प्रवेश केला होता. तसेच यापूर्वी दिलेल्या शांतता हमीपत्राचे उल्लंघन केले होते.
१९ ऑक्टोबर रोजी त्यांच्या कोठडीत आणखी दोन दिवसांची वाढ करण्यात आली होती. दिल्ली उच्च न्यायालयानेही या प्रकरणात हस्तक्षेप करण्यास नकार देत त्यांना विशेष कार्यकारी दंडाधिकाऱ्यांच्या (एसईएम) न्यायालयाच्या निर्णयाची प्रतीक्षा करण्याचे निर्देश दिले होते.