नवी दिल्ली : स्टँडअप कॉमेडियन प्रणित मोरे याच्या स्टँड-अप कॉमेडी शो दरम्यान '३७० रुपयांची बिर्याणी' या विषयावर आक्षेपार्ह आणि वादग्रस्त वक्तव्य करणाऱ्या गुरुग्राममधील हिमांशू जांगरा या तरुणाला आपली नोकरी गमावावी लागली आहे. या तरुणाच्या वक्तव्याचा व्हिडिओ सोशल मीडियावर प्रचंड व्हायरल झाल्यानंतर त्याच्यावर चहूबाजूंतून तीव्र टीका होत होती. या वाढत्या वादानंतर संबंधित कंपनीने त्याच्यावर ही कठोर कारवाई केली आहे. दरम्यान, कंपनीच्या संस्थापकाने जारी केलेल्या व्हिडिओवरही नेटकऱ्यांनी तीव्र आक्षेप घेतला आहे.
हा वाद एका स्टँडअप कॉमेडी शोच्या क्लिपमुळे सुरू झाला, जी नुकतीच सोशल मीडियावर मोठ्या प्रमाणात व्हायरल झाली होती. या व्हिडिओमध्ये हिमांशू जांगरा नावाचा तरुण त्याच्या एका 'डेट'चा अनुभव सांगताना दिसत आहे. एका तरुणीसोबत जेवायला गेल्याचे सांगत त्याने नमूद केले की, त्या दोघांनी मिळून सुमारे ३६० ते ३७० रुपयांची बिर्याणी खाल्ली. जेवणानंतर जेव्हा त्या तरुणीने त्याला घरी सोडण्याची विनंती केली, तेव्हा हिमांशूने तिला नकारार्थी उत्तर दिले. व्हिडिओमध्ये तो असे म्हणताना ऐकू येत आहे की, ‘मी तिला म्हणालो, यार ३७० रुपये खर्च झाले आहेत, ते तर मी वसूल करणारच.’
जेवणाच्या बदल्यात लैंगिक सुखाची अपेक्षा किंवा गैरफायदा घेण्याच्या उद्देशाने केलेल्या या विधानामुळे सोशल मीडियावर संतापाची लाट उसळली. हिमांशूच्या या विकृत मानसिकतेवर नेटकऱ्यांनी अत्यंत कडक शब्दांत टीका केली.
हिमांशू जांगरा हा गुरुग्राममधील 'स्टार्विक डिझाईन' या नामांकित डिझायनिंग कंपनीत कार्यरत होता. सोशल मीडियावरील वाढता विरोध आणि कंपनीच्या प्रतिमेला पोहोचणारा धक्का लक्षात घेऊन कंपनीचे संस्थापक विवेक विश्वकर्मा यांनी इन्स्टाग्रामवर एक व्हिडिओ जारी करत हिमांशूला नोकरीवरून काढून टाकण्यात आल्याची घोषणा केली.
आपल्या निवेदनात विवेक म्हणाले, ‘गेल्या २४ तासांत मला आमचा कर्मचारी हिमांशू जांगरा याच्या संदर्भात शेकडो मेसेज, ईमेल आणि फोन आले आहेत. तुमच्यासारखीच ती क्लिप माझ्याही पाहण्यात आली. मला हे अगदी स्पष्ट करायचे आहे की, त्या क्लिपमधील विधाने अत्यंत आक्षेपार्ह आहेत. मी किंवा आमची कंपनी अशा विचारसरणीचे किंवा विधानांचे मुळीच समर्थन करत नाही.’
विश्वकर्मा यांनी पुढे सांगितले की, कंपनीने या प्रकरणाची अंतर्गत चौकशी केली आणि कार्यालयातील महिला कर्मचाऱ्यांशी हिमांशूच्या वर्तनाबाबत चर्चा केली. महिला कर्मचाऱ्यांच्या मते, हिमांशूचे कार्यालयातील वर्तन आतापर्यंत व्यावसायिक, आदरयुक्त आणि चांगले राहिले होते.
परंतु, कार्यालयाबाहेरील या घटनेचा परिणाम आता कामाच्या वातावरणावर होत असल्याचे सांगत विवेक म्हणाले, ‘कार्यालयाबाहेर जे काही घडले, त्याचा प्रभाव आता कामाच्या ठिकाणावर पडू लागला आहे. माझी माझ्या कंपनीप्रती, टीमप्रती आणि ग्राहकांप्रती एक जबाबदारी आहे. म्हणूनच आम्ही हिमांशूला कंपनीतून मुक्त करण्याचा निर्णय घेतला आहे.’
यासोबतच, विवेक यांनी लोकांना आवाहन केले की, एखाद्या व्यक्तीला सुधारण्यासाठी आणि शिकण्यासाठी वाव दिला पाहिजे. ‘माणूस चुकू शकतो, त्याच्याकडून गंभीर चूक होऊ शकते आणि त्याला त्याचे परिणामही भोगावे लागतात. परंतु, आपण असा समाज बनू नये जिथे लोकांना आत्मपरीक्षण करण्याची, माफी मागण्याची किंवा बदलण्याची संधीच दिली जात नाही,’ असे त्यांनी नमूद केले.
कंपनीच्या या निर्णयानंतर सोशल मीडियावर प्रतिक्रियांचा पाऊस पडला आहे. काही युजर्सनी कंपनीच्या या त्वरित कारवाईचे स्वागत केले असले, तरी बहुतांश नेटकऱ्यांनी संस्थापकावर हिमांशूची पाठराखण केल्याचा आरोप केला आहे.
एका युजरने लिहिले, ‘या कारवाईचे स्वागत आहे.’ तर दुसऱ्या युजरने संस्थापकाच्या भूमिकेवर आक्षेप घेत म्हटले, ‘त्याची अशा प्रकारे पाठराखण करणे अधिक क्लेशदायक आहे. त्याने जे केले त्याचे परिणाम त्याने भोगले आहेत, हे प्रकरण इथेच थांबवा.’
तिसऱ्या युजरने संताप व्यक्त करत लिहिले, ‘त्याच्या बाजूने बोलू नका. त्याला स्वतःला माफी मागू द्या, त्यानंतर काय ते पाहू. अशा लोकांचे समर्थन करणे तुमची मूल्ये दर्शवते.’ तर आणखी एका कमेंटमध्ये म्हटले होते, ‘आदर, उत्तरदायित्व आणि शालीनता या गोष्टी माणसाचे चारित्र्य ठरवतात, त्याने दाखवलेले वर्तन नव्हे. अशा विचारसरणीच्या पुरुषांची आपल्याला गरज नाही; तर इतरांशी आदराने वागणाऱ्या पुरुषांची समाजाला गरज आहे.’
या संपूर्ण प्रकरणामुळे आता सोशल मीडियावर वैयक्तिक उत्तरदायित्व, कामाच्या ठिकाणची जबाबदारी आणि सार्वजनिक रोषानंतर संबंधित व्यक्तीला सुधारण्याची संधी मिळायला हवी की नाही, यावर एक मोठी राष्ट्रीय स्तरावरील चर्चा सुरू झाली आहे.