Narendra Modi |
नवी दिल्ली : 'ऑपरेशन सिंदूर’ नंतर पंतप्रधान नरेंद्र मोदी पहिल्यांदाच विदेश दौऱ्यासाठी रवाना झाले आहेत. सायप्रस, कॅनडा आणि क्रोएशिया या तीन देशांचा पाच दिवसीय दौरा ते करणार आहेत. कॅनडामध्ये होणाऱ्या G-7 शिखर परिषदेत ही मोदी सहभागी होणार आहेत.
पंतप्रधान नरेंद्र मोदी रविवारी सायप्रसला रवाना झाले. पंतप्रधान मोदी १५ ते १८ जून दरम्यान परदेश दौऱ्यावर आहेत. या काळात ते सायप्रस, कॅनडा आणि क्रोएशियाला भेट देतील. ऑपरेशन सिंदूर नंतर पंतप्रधान मोदींचा हा पहिला परदेश दौरा द्विपक्षीय संबंध वाढवण्याच्या आणि युरोपियन युनियन आणि भूमध्यसागरीय प्रदेशाशी भारताचे संबंध मजबूत करण्याच्या दृष्टीने महत्त्वाचा मानला जातो.
पंतप्रधान मोदी सायप्रस नंतर कॅनडाला जाणार आहेत. परराष्ट्र मंत्रालयाने सांगितले की, १५-१६ जूनचा हा दौरा सायप्रस प्रजासत्ताकाचे अध्यक्ष निकोस क्रिस्टोडौलिडेस यांच्या निमंत्रणावरून होत आहे. दोन दशकांत भारतीय पंतप्रधानांचा हा पहिलाच सायप्रस दौरा आहे. पंतप्रधान मोदी आणि राष्ट्राध्यक्ष क्रिस्टोडौलिडेस यांच्यात राजधानी निकोसियामध्ये चर्चा होईल. ते लिमासोलमध्ये उद्योजकांना संबोधित करतील. दौऱ्याच्या दुसऱ्या टप्प्यात, पंतप्रधान मोदी १६-१७ जून रोजी कॅनडामध्ये असतील आणि सलग सहाव्यांदा जी-७ शिखर परिषदेत सहभागी होतील. जी-७ देशांच्या नेत्यांसोबत द्विपक्षीय बैठका देखील घेणार आहेत.
पंतप्रधान मोदी १८ जून रोजी क्रोएशियाला भेट देणार आहेत. आतापर्यंत भारतीय पंतप्रधानांचा या देशाचा पहिलाच दौरा असेल. पंतप्रधान मोदी पंतप्रधान प्लेनकोविक यांच्याशी द्विपक्षीय चर्चा करतील आणि क्रोएशियाचे अध्यक्ष झोरन मिलानोविक यांचीही भेट घेतील.