Air India Phuket Delhi Flight Incident: फुकेतहून दिल्लीला येणारं Air Indiaचं Airbus A320 विमान 4 ऑगस्ट रोजी हवेतून अचानक खाली आलं. या घटनेत 24 प्रवासी जखमी झाले होते. आता Airbusने या घटनेबाबतचा प्राथमिक आढावा Air Indiaला दिला असून विमानाची तांत्रिक स्थिती आणि अलीकडील देखभालीची माहिती पण मागवली आहे.
Airbusच्या प्राथमिक तपासणीनुसार, विमानाच्या हायड्रॉलिक सिस्टिममध्ये काही सेकंदांसाठी बिघाड झाला होता. विमानातील हायड्रॉलिक सिस्टिममध्ये दाब असलेले द्रव असतात. या माध्यमातून विमानाच्या विविध नियंत्रण यंत्रणा कार्यरत राहतात.
4 ऑगस्ट रोजी सकाळी 9:32:44 ते 9:32:51 या सुमारे सात सेकंदांच्या कालावधीत विमानाच्या हायड्रॉलिक सिस्टिममध्ये समस्या निर्माण झाल्याचे डिजिटल फ्लाइट डेटा रेकॉर्डरच्या तपासणीत समोर आले आहे. या काळात विमानाचा ऑटोपायलट बंद झाला आणि विमानाचा पुढचा भाग म्हणजेच नोज वरच्या दिशेने गेला.
घटनेनंतर सुमारे पाच सेकंदांनी विमानातील एक हायड्रॉलिक सिस्टिम पुन्हा कार्यरत झाली. त्यानंतर काही सेकंदांत उर्वरित दोन हायड्रॉलिक सिस्टिमही पूर्ववत झाल्या.
यानंतर विमानाच्या नियंत्रण यंत्रणा पुन्हा काम करू लागल्या आणि विमानाची परिस्थिती नियंत्रणात आली. मात्र अचानक झालेल्या उंचीतील बदलामुळे विमानावर अपेक्षेपेक्षा जास्त भार पडला होता.
या घटनेचा सखोल तपास करण्यासाठी Airbusने Air Indiaला काही तांत्रिक तपासण्या करण्यास सांगितल्या आहेत. विमानाच्या अलीकडील मेंटेनन्सदरम्यान कोणती कामे करण्यात आली होती, याची माहितीही Airbusने मागितली आहे.
तसेच विमानाची तपासणी करून त्याचे रिपोर्ट Airbusकडे पाठवण्यास सांगण्यात आले आहे. याशिवाय विमानातील पायलटांनी या घटनेदरम्यान नेमकं काय पाहिलं आणि काय घडलं, याबाबत अधिक सविस्तर अहवाल देण्यासही सांगण्यात आले आहे.
या घटनेमुळे विमानाच्या उंचीत अचानक मोठा बदल झाला असल्याने त्याच्या संरचनेवरही परिणाम झाला असण्याची शक्यता Airbusने व्यक्त केली आहे.
त्यामुळे केवळ विमानाच्या हायड्रॉलिक किंवा कंट्रोल सिस्टिमचीच नाही, तर विमानाच्या संपूर्ण स्ट्रक्चरची म्हणजेच एअरफ्रेमचीही तपासणी करण्याची गरज आहे.
दरम्यान, या घटनेची चौकशी सुरू असताना काही वैमानिकांनी आणखी एक प्रश्न उपस्थित केला आहे. विमानातील तांत्रिक समस्या काही वेळात नियंत्रणात आल्यानंतरही Air Indiaने ते विमान फुकेतहून थेट दिल्लीपर्यंत का आणले, असा सवाल काही पायलट करत आहेत. मात्र या निर्णयामागे नेमकी कारणे काय होती, हे अधिकृत तपास पूर्ण झाल्यानंतरच स्पष्ट होण्याची शक्यता आहे.
या संपूर्ण घटनेची चौकशी Aircraft Accident Investigation Bureau (AAIB)च्या देखरेखीखाली सुरू आहे. Airbus आणि फ्रान्समधील संबंधित विमान अपघात तपास यंत्रणाही या घटनेच्या तांत्रिक बाबींचा अभ्यास करत आहेत.
सध्या Airbusचा अहवाल हा प्राथमिक आढावा आहे. त्यामुळे विमानात नेमका कोणता तांत्रिक बिघाड झाला, हायड्रॉलिक सिस्टिममध्ये समस्या का निर्माण झाली आणि त्याचा विमानाच्या नियंत्रणावर नेमका किती परिणाम झाला, याचे अंतिम उत्तर सविस्तर तपासणीनंतरच मिळणार आहे. या घटनेमुळे विमानाच्या देखभालीपासून ते पायलटच्या निर्णयापर्यंत अनेक प्रश्न उपस्थित झाले आहेत.