Wildlife photography awards 2026
लंडन: झिम्बाब्वेच्या जांबेझी नॅशनल पार्कमध्ये शेणाच्या गोळ्यासाठी धडपडणाऱ्या एका छोट्याशा भुंग्याचे टिपलेले दुर्मिळ क्षणचित्र यंदाच्या वर्षातील सर्वोत्तम छायाचित्र ठरले आहे. अवघ्या १४ वर्षांच्या ऑस्कर व्हिटफिल्ड या ब्रिटीश छायाचित्रकाराने टिपलेल्या या कृष्णधवल छायाचित्राला लंडनच्या नॅचरल हिस्ट्री म्युझियमतर्फे दिला जाणारा प्रतिष्ठित 'यंग वाईल्डलाईफ फोटोग्राफर ऑफ द इयर २०२६' हा मानाचा पुरस्कार जाहीर झाला आहे.
'लेबर ऑफ लव्ह' असे शीर्षक असलेल्या या छायाचित्रात, वाळूच्या चढावावर शेणाचा गोळा ढकलत नेणारा भुंगा आणि त्याच्यामागे घिरट्या घालणाऱ्या माशांचे विलोभनीय आणि संघर्षमय दृश्य कॅमेऱ्यात अचूक टिपण्यात आले आहे.
व्हिटफिल्ड हा आपल्या कुटुंबासोबत जंगलात फिरत असताना त्याला हा भुंगा दिसला. वरून पाहिल्यास अगदी साधी वाटणारी ही गोष्ट सूक्ष्म पातळीवर किती कष्टाची आहे, हे जगाला दाखवून देण्यासाठी त्याने जमिनीवर झोपून छायाचित्रे टिपली.
यंदाच्या स्पर्धेत जगभरातील वन्यजीव आणि निसर्गाचे अप्रतिम व दुर्मिळ क्षण टिपणाऱ्या इतरही छायाचित्रकारांनी बाजी मारली आहे. जेम्स लेविन यांनी प्राण्यांना त्यांच्या नैसर्गिक अधिवासात टिपले आहे. त्यांच्या कृष्णधवल फोटोमध्ये एक तरुण नर हत्ती पाणवठ्यावर झेब्रांवर पाणी फवारताना दिसतो.
इटालियन छायाचित्रकार फेडेरिको वेरोनेसी याने नामिबियाच्या हुआब नदीच्या खोऱ्यात आपल्या मृत पिल्लाला घेऊन जाणाऱ्या हत्तीणीचे अत्यंत भावूक क्षणचित्र टिपले. या छायाचित्रासाठी त्याला मुख्य 'वाईल्डलाईफ फोटोग्राफर ऑफ द इयर २०२६' चा पुरस्कार मिळाला.
१० वर्षांखालील गटात अम्युली डेव्हिस या लहान मुलीने तिच्या वडिलांच्या सामान्य स्मार्टफोनचा वापर करून आपल्या बागेत उडणाऱ्या भुंग्याचे छायाचित्र टिपले. उत्तम छायाचित्रासाठी महागड्या कॅमेऱ्याची गरज नसते, हे तिने सिद्ध केले.
भारताच्या सीताराम राऊळ यांनी राजस्थानच्या थार वाळवंटात कडक उन्हापासून वाचण्यासाठी वाळूत खड्डा करून लपणाऱ्या विंचवाचे अप्रतिम छायाचित्र टिपून सर्वांचे लक्ष वेधून घेतले.
जर्मनीतील कॉनराड ग्रेटर यांनी पहाटेच्या वेळी गाणाऱ्या पक्षाचे मनमोहक छायाचित्र टिपले, तर जेम्स लेविन यांनी 'इन्फ्रारेड' कॅमेऱ्याचा वापर करून हत्ती आणि जिराफांच्या पाणवठ्यावरील विलोभनीय दृश्याला कॅमेऱ्यात कैद केले.