पुढारी ऑनलाईन डेस्क : कॉमेडियन कपिल शर्मा आणि राजपाल यादव यांना धमकीचा ईमेल पाठवण्यात आला आहे. हा ईमेल पाकिस्तानमधून पाठवण्यात संशय पोलिसांना आहे. या दोन स्टार्स व्यतिरिक्त सुगंधा मिश्रा आणि रेमो डिसूझा यांनाही धमक्या मिळाल्या आहेत. या घटनेबाबत पोलिसांनी तक्रार नोंदवली आहे.
अभिनेता राजपाल यादव, विनोदी कलाकार कपिल शर्मा, सुगंधा मिश्रा आणि रेमो डिसूझा यांना मिळालेल्या धमकीच्या ईमेल प्रकरणी पोलिसांनी एफआयआर दाखल केला आहे आणि तपास सुरू आहे. या स्टार्सना ईमेल पाठवणाऱ्या व्यक्तीने धमकी दिली आहे की जर आठ तासांच्या आत या स्टार्सकडून कोणताही प्रतिसाद मिळाला नाही तर कारवाई केली जाईल. अहवालानुसार, प्राथमिक तपासात असे दिसून आले आहे की धमकीचा ईमेल पाकिस्तानमधून पाठवण्यात आला होता.
ईमेलमध्ये केवळ या स्टार्सनाच नाही तर त्यांच्या जवळच्या व्यक्तींना आणि नातेवाईकांनाही लक्ष्य करण्यात आले आहे. या प्रकरणी मुंबईतील अंबोली पोलिसांत तक्रार दाखल करण्यात आली आहे. पोलिसांनी कलम 351 (3) अंतर्गत गुन्हा दाखल केला आहे. पोलिस तपासानुसार, ईमेलचा आयपी अॅड्रेस पाकिस्तानचा आहे. सध्या या स्टार्स किंवा त्यांच्या कुटुंबियांकडून या संदर्भात कोणतेही विधान जारी केलेले नाही.
मीडिया रिपोर्ट्सनुसार, हा धमकीचा ईमेल विष्णू नावाच्या व्यक्तीने पाठवला आहे. त्यात म्हटले आहे की, 'आम्ही हे सर्व पब्लिसिटी स्टंट म्हणून करत नाही आहोत. तुमच्या सर्व हालचालींची माहिती आमच्याकडे आहे. आम्हाला पुढील 8 तासांत तुमच्याकडून त्वरित प्रतिसाद अपेक्षित आहे. जर आम्हाला कोणतेही उत्तर मिळाले नाही, तर आम्ही असे गृहीत धरू की तुम्ही हे प्रकरण गांभीर्याने घेत नाही आहात - विष्णू. पोलिस आयपी अॅड्रेस आणि इतर तांत्रिक माहितीच्या आधारे याचा तपास करत आहेत.