नवी दिल्ली : इराणशी संबंधित कोणत्याही समस्येवर लष्करी कारवाई हा अंतिम पर्याय असू शकत नाही, असे स्पष्ट प्रतिपादन इराणचे परराष्ट्र मंत्री अब्बास अराघची यांनी केले आहे. आपल्या भारत दौऱ्यादरम्यान नवी दिल्ली येथे आयोजित पत्रकार परिषदेत ते बोलत होते. यावेळी त्यांनी होर्मुझच्या सामुद्रधुनीतील तणावपूर्ण परिस्थितीवर भाष्य करताना सर्व व्यापारी जहाजांना सुरक्षित मार्ग देण्याची तयारी दर्शवली.
परराष्ट्र मंत्री अराघची यांनी स्पष्ट केले की, इराणने कधीही अण्वस्त्रांची आकांक्षा धरलेली नाही. सध्या होर्मुझच्या सामुद्रधुनीतील परिस्थिती अत्यंत गुंतागुंतीची असून, संवाद आणि कराराशिवाय यावर कोणताही दुसरा मार्ग उपलब्ध नाही. ते म्हणाले की, "आम्ही होर्मुझच्या सामुद्रधुनीतून सर्व जहाजांचा प्रवास सुरक्षित व्हावा यासाठी सहकार्य करण्यास तयार आहोत. तसेच, या भागातील परिस्थिती सुधारण्यासाठी चीनकडून उचलल्या जाणाऱ्या कोणत्याही पावलाचे आम्ही स्वागतच करू." इराणने नेहमीच मुत्सद्देगिरीला प्राधान्य दिले असून, युद्धविराम टिकवून ठेवण्यासाठी सातत्याने प्रयत्न केले असल्याचेही त्यांनी यावेळी नमूद केले.
पश्चिम आशियातील वाढत्या संकटाच्या पार्श्वभूमीवर भारताच्या संभाव्य मध्यस्थीबाबत विचारले असता, अराघची यांनी सकारात्मक प्रतिसाद दिला. "या संकटकाळात भारत कोणतीही विधायक भूमिका बजावणार असेल, तर इराण त्याचे मनापासून स्वागत करेल," असे ते म्हणाले. भारताचे इराणशी असलेले ऐतिहासिक संबंध पाहता, शांतता प्रस्थापित करण्यासाठी भारताचे योगदान महत्त्वपूर्ण ठरू शकते, असा विश्वास त्यांनी व्यक्त केला.
यावेळी त्यांनी अमेरिका आणि पाकिस्तानशी संबंधित मुद्द्यांवरही आपली मते मांडली. पाकिस्तानने केलेली मध्यस्थी अद्याप अपयशी ठरलेली नाही, असे सांगतानाच त्यांनी अमेरिकेवर निशाणा साधला. इराणकडे अमेरिकेवर अविश्वास दाखवण्यासाठी पुरेशी कारणे आहेत, तर अमेरिकेने मात्र इराणवर विश्वास ठेवण्यासाठी प्रयत्न करण्याची गरज आहे, असे सूचक विधान त्यांनी केले. इराणच्या प्रश्नांवर केवळ चर्चेतूनच तोडगा निघू शकतो, यावर त्यांनी पुन्हा एकदा भर दिला.