Smit Machchhar
नवी दिल्ली: तेल अवीवला जाणाऱ्या 'फ्लाई दुबई' विमानामध्ये मोठा विमान अपघात टळण्यासाठी आणि १७४ प्रवाशांचे प्राण वाचवण्यासाठी अमूल्य योगदान देणारे भारतीय पायलट कॅप्टन स्मित मच्छार यांना इस्रायलचा सर्वोच्च 'राष्ट्रपती नागरिक शौर्य पुरस्कार' प्रदान करण्यात येणार आहे. इस्रायलचे राष्ट्राध्यक्ष इसाक हर्जोग यांनी गुरुवारी जेरुसलेम येथे एका विशेष कार्यक्रमात ही घोषणा केली.
गेल्या आठवड्यात घडलेल्या या थरारक घटनेत फ्लाई दुबईच्या FZ1073 या विमानातील सह-पायलटने कॉकपिटमध्येच कॅप्टन स्मित मच्छार यांच्यावर प्राणघातक हल्ला केला होता. मात्र, कॅप्टन मच्छार आणि सतर्क प्रवाशांच्या प्रसंगावधानामुळे एक भीषण जागतिक विमान दुर्घटना टळली. या घटनेत गंभीर जखमी झालेले कॅप्टन स्मित मच्छार सध्या अबू धाबी येथील रुग्णालयात उपचार घेत असून त्यांची प्रकृती सुधारत आहे. प्रकृती पूर्ण बरी झाल्यानंतर त्यांना इस्रायलच्या जनतेच्या वतीने हा अत्यंत प्रतिष्ठित पुरस्कार सन्मानाने प्रदान केला जाईल, असे राष्ट्राध्यक्ष हर्जोग यांनी स्पष्ट केले.
जेरुसलेममधील कार्यक्रमात राष्ट्राध्यक्ष हर्जोग यांनी या प्रसंगी मदत करणाऱ्या सहा इस्रायली प्रवाशांनाही 'राष्ट्रपती नागरिक शौर्य पदक' प्रदान करून गौरवले जाईल असे सांगितले. ताली मॅनेस, झ्विका मॅनेस, यानिव हायौन, डॉ. शोटा मुसायएव, असाफ राजुआन आणि ओर पार्दिलोव अशी सन्मानित प्रवाशांची नावे आहेत. ताली मॅनेस यांनी सर्वप्रथम धोक्याची घंटा वाजवली होती, तर इतरांनी सह-पायलटला नियंत्रित करण्याचे धाडस दाखवले. तसेच डॉ. मुसायएव यांनी जखमी कॅप्टनवर तात्काळ वैद्यकीय उपचार केले. १७४ निष्पाप प्रवाशांचे प्राण वाचवणारे हे सर्व सामान्य नागरिक नसून खरे हिरो असल्याचे हर्जोग यांनी कौतुकास्पद उद्गार काढले.
फ्लाई दुबईचे विमान FZ1073 हे १७४ प्रवाशांना घेऊन इस्रायलकडे जात असताना हा प्रकार घडला होता. ओमानचा नागरिक असलेल्या सह-पायलट हमाम अल-हम्गामी याने कॉकपिटमध्येच क्रॅश कुऱ्हाडीने कॅप्टन मच्छार यांच्यावर हल्ला करत विमानाचा ताबा घेण्याचा प्रयत्न केला होता. या आपत्कालीन परिस्थितीत विमानाने ३४ हजार फुटांवरून तब्बल १७ हजार फुटांहून अधिक वेगाने खाली झेप घेत सौदी अरेबियामध्ये इमर्जन्सी लँडिंग केले होते. संयुक्त अरब अमिरातीने या घटनेचे वर्गीकरण 'दहशतवादी हल्ल्याचा प्रयत्न' असे केले आहे.