पुढारी ऑनलाईन डेस्क : भारतीय लष्कराने केलेल्या कारवाईत काश्मीर येथील अखनूर सेक्टरमध्ये तीन दहशतवादी मारले गेले. पण दहशतवाद्यांनी केलेल्या हल्ल्यात भारतीय लष्कराचा जाँबाज श्वान फॅन्टम (Indian Army dog Phantom) मात्र शहीद झाला आहे.
दहशतवाद्यांनी भारतीय लष्कराच्या रुग्णवाहिकेवर हल्ला केला. त्यानंतर दहशतवाद्यांना संपवण्याची कारवाई सुरू करण्यात आली. सैनिकांनी सोमवारी सायंकाळी एका दहशतवाद्याला कंठस्नान घातले, तर मंगळवारी सकाळी आणखी दोन दहशतवाद्यांना ठार मारण्यात आले.
लष्कराने केलेल्या कारवाईत विशेष पथक, नॅशनल सिक्युरिटी गार्डचे कमांडो यांनी भाग घेतला. हेलिकॉप्टर आणि ड्रोनने या मोहिमेत महत्त्वाचे सहकार्य केले. पण दहशतवाद्यांनी केलेल्या गोळीबारात फॅन्टम शहीद झाला. फॅन्टम हा श्वान बेल्जियम मेलिनो जातीचा होता आणि त्याचे वय ४ वर्षं होते.
भारतीय लष्कराने एक्स पोस्ट करत फॅन्टमला श्रद्धांजली वाहिली आहे. "फॅन्टमने सर्वोच्च बलिदान दिले आहे, आम्ही त्याला नमन करतो. दहशतवाद्यांविरोधातील ही मोहीम संपण्याच्या मार्गावर होती, त्याच वेळी फॅन्टम जखमी झाली. त्याचे धाडस आणि प्रामाणिकपणा कधीही विसरता येणार नाही," असे लष्कराने म्हटले आहे.