पुढारी ऑनलाईन डेस्क : "चीन आपल्या सर्वांची परीक्षा घेत आहे," अशा शब्दांमध्ये अमेरिकेचे राष्ट्राध्यक्ष जो बायडेन ( Joe Biden) यांनी चिंता व्यक्त केली. 'क्वाड'च्या बेठकीत त्यांनी व्यक्त केलेली चिंता नेत्यांनी हॉट माइकवर ऐकली. यावरुन अमेरिका चीनच्या वाढत्या वर्चस्ववादाबाबत किती गंभीर आहे हे पुन्हा एकदा स्पष्ट झाले.
क्वाड्रीलेटरल सिक्योरिटी डायलॉग (क्वाड) ही भारत, ऑस्ट्रेलिया, जपान आणि अमेरिका या चार देशांची संयुक्त संस्था आहे. हिंद महासागरातील त्सुनामीनंतर आपत्ती निवारणाच्या प्रयत्नांवर सहकार्यासाठी चार देशांनी चर्चा सुरू केली होती. यंदा या संस्थेची बैठक विल्मिंग्टन येथे हाेत आहे.या निमित्त पंतप्रधान नरेंद्र मोदी, अमेरिकेचे राष्ट्राध्यक्ष जो बायडेन, ऑस्ट्रेलियाचे पंतप्रधान अँथनी अल्बानीज आणि जपानचे पंतप्रधान फुमियो किशिदा यांच्यात चर्चा झाली. यावेळी अमेरिकेचे राष्ट्राध्यक्ष बायडेन यांनी हॉट माईकवर, चीन आमची परीक्षा घेत असल्याचे सांगितले.
बैठकीदरम्यान बायडेन म्हणाले की, "आमचा विश्वास आहे की चीनचे राष्ट्राध्यक्ष शी जिनपिंग हे देशांतर्गत आर्थिक आव्हानांवर लक्ष केंद्रित करू इच्छितात. चीनमधील अशांतता कमी करण्यासाठी आर्थिक आणि तंत्रज्ञानाच्या मुद्द्यांसह अनेक आघाड्यांवर चीन आक्रमकपणे आपल्या सर्वांची चाचणी घेत आहे. आमचा विश्वास आहे की, तीव्र स्पर्धेसाठी तीव्र मुत्सद्देगिरी आवश्यक आहे."
चीन संपूर्ण दक्षिण चीन समुद्रावर सार्वभौमत्वाचा दावा करतो, तर व्हिएतनाम, मलेशिया, ब्रुनेई आणि फिलिपाइन्स सारख्या दक्षिणपूर्व आशियाई देशांनी प्रतिदावे केले आहेत. बायडेन यांनी क्वाड नेत्यांना सांगितले की, शी जिनपिंग यांना देशांतर्गत आर्थिक आव्हानांवर लक्ष केंद्रित करायचे आहे आणि चीनमधील अशांतता कमी करायची आहे.