पुढारी ऑनलाईन डेस्क : नुकताच T20 विश्वचषक जिंकून परतलेल्या भारतीय स्टार फलंदाज विराट कोहलीच्या मालकीच्या पबवर पोलिसांनी कारवाई केली आहे. कोहलीच्या बेंगळुरूतील 'वन ८ कम्युन' या पबवर गुन्हा दाखल करण्यात आला आहे. रात्री उशिरापर्यंत पब सुरू ठेवल्याप्रकरणी कर्नाटक पोलिसांनी ही कारवाई केली आहे.
बेंगळुरू शहरात रविवारी रात्री उशिरापर्यंत सुरू असलेल्या अनेक पबच्या व्यवस्थापनाविरुद्ध पोलिसांनी कारवाई केली. यापैकी एक पब विराट कोहलीच्या मालकीचा आहे. एमजी रोडवरील 'वन 8 कम्युन' हा पब विराट कोहलीचा आहे. रात्री मोठ्या आवाजात संगीत वाजवले जात असल्याच्या तक्रारी मिळाल्यानंतर पोलिसांनी पब व्यवस्थापकाविरुद्ध एफआयआर नोंदवला आहे.
बेंगळुरू पोलिसांचे डीसीपी सेंट्रलने सांगितले की, आम्ही तीन-चार पबवर कारवाई केली आहे. ज्यांनी पब पहाटे दीड वाजेपर्यंत उघडे ठेवल्याचा आरोप आहे. पबमध्ये मोठ्या आवाजात संगीत वाजवले जात असल्याची तक्रार आम्हाला मिळाली होती. पब्स फक्त रात्री १ वाजेपर्यंतच सुरू ठेवण्याची परवानगी आहे, त्यानंतर कोणतेही पब उघडे राहू शकत नाहीत.