पुढारी ऑनलाईन डेस्क : जयपूरहून मुंबईच्या दिशेने येणाऱ्या इंडिगोच्या विमानात कर्मचाऱ्यांना फ्लाइटच्या बाथरूममध्ये धमकीचे पत्र सापडल्याने गोंधळ उडाला. जेव्हा विमान उतरले तेव्हा नियमित तपासणी दरम्यान हे पत्र सापडले. तथापि, तपासादरम्यान मुंबई पोलिसांना विमानामध्ये काहीही संशयास्पद आढळले नाही.
सोमवारी रात्री ९ वाजताच्या सुमारास, जयपूरहून मुंबईला जाणारे इंडिगोचे विमान विमानतळावर सामान्यपणे उतरले. लँडिंगनंतर, कर्मचारी विमानाची नियमित तपासणी करत होते. यावेळी कर्मचाऱ्यांना बाथरूममध्ये एक पत्र सापडले. ज्यामध्ये असे लिहिले होते की विमान बॉम्बने उडवले जाईल. त्यानंतर हे प्रकरण तात्काळ पोलिसांना कळवण्यात आले. पोलिसांनी बॉम्ब निकामी पथकासह घटनास्थळी धाव घेतली आणि तपास सुरू केला. चौकशीदरम्यान काहीही संशयास्पद आढळले नाही. तपासणीनंतर विमान पूर्णपणे सुरक्षित घोषित करण्यात आले.
जयपूरहून मुंबईला जाणाऱ्या विमानात बॉम्ब धोक्याच्या पत्राबाबत छत्रपती शिवाजी महाराज इंटरनॅशनलने अधिकृत निवेदन जारी केले आहे. अधिकृत निवेदनात म्हटले आहे की, 'जयपूरहून मुंबईला येणाऱ्या विमानात एक धमकीचे पत्र सापडले. खबरदारीचा उपाय म्हणून, रात्री ८:४३ वाजता मुंबई विमानतळावर पूर्ण आणीबाणी जाहीर करण्यात आली. सकाळी ८:५० वाजता विमान सुरक्षितपणे उतरले. आता विमानतळावरील कामकाज सामान्य झाले आहे. सीएसएमआयए, विमान कंपनी आणि सुरक्षा एजन्सींचे अधिकारी परिस्थितीवर लक्ष ठेवून आहेत.
हे धमकीचे पत्र बाथरूममध्ये कोणी ठेवले आणि त्यामागील हेतू काय होता हे आता मुंबई पोलिस शोधण्याचा प्रयत्न करत आहेत. पोलिस अधिकारी सीसीटीव्ही फुटेज तपासत आहेत. या प्रकरणाची सखोल चौकशी व्हावी म्हणून प्रवाशांची आणि कर्मचाऱ्यांची चौकशी केली जात आहे. अलिकडच्या काळात, इंडिगोच्या विमानांना बॉम्बच्या धमक्या अनेक वेळा आल्या आहेत, त्यापैकी बहुतेक खोटे ठरले आहेत. जानेवारी २०२५ मध्ये, इंडिगोच्या फ्लाइट ६ई ५१०१ ला बॉम्बची धमकी मिळाली. हे विमान गोव्याहून मुंबईला जात होते. नंतरच्या तपासात काहीही संशयास्पद आढळले नाही.