अहमदाबादजवळ गुरुवारी (दि. 12) झालेल्या एअर इंडिया फ्लाइट AI-171 च्या भीषण विमान दुर्घटनेने संपूर्ण देश हादरला. या अपघातात 242 प्रवाशांपैकी अनेकांचा मृत्यू झाला, तर अनेक जण जखमी झाले. या दुर्घटनेत विमान सरदार वल्लभभाई पटेल आंतरराष्ट्रीय विमानतळावरून लंडन गॅटविकला जात असताना दुपारी 1:38 वाजता उड्डाणानंतर काही मिनिटांतच मेघनीनगरजवळ बी.जे. मेडिकल कॉलेजच्या हॉस्टेलवर कोसळले. या दुर्घटनेनंतर एअर इंडियाची मालक कंपनी टाटा समूहाने तातडीने प्रतिक्रिया देत पीडित कुटुंबांना आणि जखमींना मदत जाहीर केली आहे. टाटा सन्सचे अध्यक्ष एन. चंद्रशेखरन यांनी X वर पोस्ट करत सविस्तर मदतीची घोषणा केली.
टाटा समूहाने अहमदाबाद विमान दुर्घटनेत मृत्यूमुखी पडलेल्या प्रत्येक व्यक्तीच्या कुटुंबाला 1 कोटी रुपयांची आर्थिक मदत देण्याची घोषणा केली आहे. याशिवाय, जखमींच्या वैद्यकीय खर्चाचा पूर्ण भार टाटा समूह उचलणार असून, त्यांना सर्व आवश्यक वैद्यकीय सुविधा आणि पुनर्वसनाची हमी दिली आहे. या अपघातात बी.जे. मेडिकल कॉलेजचे हॉस्टेल मोठ्या प्रमाणात नष्ट झाले, ज्यामुळे वैद्यकीय विद्यार्थ्यांचे मोठे नुकसान झाले आहे. टाटा समूहाने या हॉस्टेलच्या पुनर्बांधणीसाठी आर्थिक आणि तांत्रिक सहाय्य देण्याचे वचन दिले आहे, जेणेकरून वैद्यकीय शिक्षणाची क्षमता पुन्हा विकसित होऊ शकेल.
टाटा सन्सचे अध्यक्ष एन. चंद्रशेखरन यांनी X वर पोस्ट केलेल्या निवेदनात म्हटले आहे, ‘आम्हाला एअर इंडिया फ्लाइट 171 च्या या दुखद अपघातामुळे प्रचंड दु:ख झाले आहे. आमच्या भावना आणि प्रार्थना मृतांच्या कुटुंबीयांसोबत आणि जखमींना बरे वाटण्यासाठी आहेत. टाटा समूह या संकटसमयी मृत्यूमुखी पडलेल्या प्रत्येक व्यक्तीच्या कुटुंबाला 1 कोटी रुपये देईल. आम्ही जखमींच्या वैद्यकीय खर्चाची संपूर्ण जबाबदारी घेऊ. त्यांना सर्व आवश्यक काळजी घेतली जाईल. याव्यतिरिक्त, आम्ही बी.जे. मेडिकल कॉलेजच्या हॉस्टेलच्या पुनर्बांधणी करण्यास वचनबद्ध आहे.’ चंद्रशेखरन यांनी CNBC-TV18 ला दिलेल्या मुलाखतीत या दिवसाला आपल्या व्यावसायिक कारकीर्दीतील सर्वात वाईट दिवस असल्याची भावना व्यक्त केली.
टाटा ट्रस्ट्सचे अध्यक्ष नोएल टाटा यांनीही या घटनेवर शोक व्यक्त करत म्हटले, ‘या हृदयद्रावक घटनेने असंख्य कुटुंबांना प्रचंड दु:ख दिले आहे. आमच्या भावना मृतांच्या कुटुंबीयांसोबत आहेत. आम्ही त्यांच्या पाठीशी खंबीरपणे उभे आहोत.’
एअर इंडिया फ्लाइट AI-171, बोईंग 787 ड्रीमलाइनर, अहमदाबादहून लंडन गॅटविकला जात होती. विमानात 230 प्रवासी, 10 केबिन क्रू आणि 2 वैमानिक असे एकूण 242 जण होते. उड्डाणानंतर अवघ्या काही मिनिटांत विमान मेघनीनगर परिसरात बी.जे. मेडिकल कॉलेजच्या हॉस्टेलवर कोसळले. या अपघातात अनेक प्रवाशांचा मृत्यू झाला, तर हॉस्टेलमधील काही विद्यार्थ्यांचाही बळी गेला. अपघाताचे नेमके कारण अद्याप समजलेले नाही, परंतु ब्लॅक बॉक्स (फ्लाइट डेटा रेकॉर्डर आणि कॉकपिट व्हॉइस रेकॉर्डर) तपासासाठी पाठवण्यात आले आहेत.