नारायणगाव (पुणे ) : पुढारी वृत्तसेवा : नारायणगाव पोलीस स्टेशन हद्दीतील कांदळी येथील तुळजाभवानी सांस्कृतिक कला केंद्रासमोर गावठी पिस्तूल बाळगून फिरणाऱ्या इसमास नारायणगाव पोलिसांनी ताब्यात घेऊन त्याच्याकडून ३० हजार रु किमतीचे एक गावठी बनावटीचे मॅक्झिन असलेले पिस्तूल व २ लाख रु किमतीची बुलेट मोटरसायकल असा २ लाख ३० हजाराचा माल जप्त केला. ही माहिती नारायणगाव पोलीस स्टेशनचे सहाय्यक पोलीस निरीक्षक पृथ्वीराज ताटे यांनी दिली. सागर अरुण चौगुले (वय २८, रा. शुक्रवार पेठ जुन्नर) असे पोलिसांनी ताब्यात घेतलेल्या इसमाचे नाव असून याबाबतची फिर्याद पोलीस कॉन्स्टेबल शैलेश वाघमारे यांनी दिली.
पोलिसांनी दिलेल्या माहितीनुसार, पुणे-नाशिक हायवेवरील कांदळी गावचे हद्दीतील तुळजाभवानी सांस्कृतिक कला केंद्रसमोर एक इसम खाकी रंगाच्या बुलेट मोटरसायकलीवर त्याचे ताब्यात गावठी बनावटीचा पिस्तूल घेऊन येणार असल्याची खात्रीशीर बातमी मिळाल्याने ताटे, पोलीस नाईक मंगेश लोखंडे, पोलीस कॉन्स्टेबल शैलेश वाघमारे व दोन पंच रवाना होवून सदर संशयित व्यक्तीस ताब्यात घेऊन त्याच्या अंगझडती केली. यावेळी त्याच्याकडे एक गावठी बनावटीचा पिस्तूल व एक बुलेट मोटरसायकल जप्त करण्यात येऊन त्यावर भारतीय शस्त्र अधिनियम नुसार गुन्हा दाखल करण्यात आला. या गुन्ह्याचा तपास पोलीस हवालदार पोपट मोहरे हे करत आहेत. ही कामगिरी पोलीस अधीक्षक अंकित गोयल, अपर पोलीस अधीक्षक मितेश घट्टे, उपविभागीय पोलीस अधिकारी मंदार जवळे यांचे मार्गदर्शनाखाली सहा. पोलीस निरीक्षक पृथ्वीराज ताटे, पोलीस नाईक मंगेश लोखंडे, पोलीस कॉन्स्टेबल शैलेश वाघमारे यांचे पथकाने केली आहे.