वडीगोद्री, पुढारी वृत्तसेवा : आपल्यावर अन्याय होत असेल, तर आपल्याला बोलायला पाहिजे, जर आपण गप्प बसलो, तर आपल्याला कोणीही मदत करायला येणार नाही. त्यामुळे आता थोडी दहशत माजवायची आणि जे पाहिजे करुन घ्यायचे, समोरच्या दरवाज्यातून प्रवेश मिळत नाही, म्हणून मागच्या दरवाज्यातून प्रवेश मिळवायचे काम सध्या सुरू आहे, आमचा मराठा आरक्षणाचा विरोध नाही, पण सरसकट आरक्षणास विरोध असेल, अशी ठोस भूमिका अन्न व नागरी पुरवठा मंत्री छगन भुजबळ यांनी बोलून दाखवली. ते वडीगोद्री येथे कार्यकर्त्यांशी बोलत होते.
मंत्री छगन भुजबळ मराठवाड्याच्या दौऱ्यावर आले आहेत. छत्रपती संभाजीनगर येथून बीडकडे जाताना त्यांचे वडीगोद्री येथे समर्थकांकडून भव्य स्वागत केले.
यावेळी भुजबळ म्हणाले की, मराठा समाजाला सरसकट ओबीसीतून आरक्षण देण्यास विरोध आहे. १७ नोव्हेंबर रोजी अंबड येथे ओबीसींच्या महामोर्चाचे आयोजन केले जाणार असल्याचे त्यांनी सांगितले. कुणीही कोणत्याही आमंत्रणाची वाट न पाहता सर्वांनी मोठ्या संख्येने एकत्रित येण्याचे आवाहन भुजबळ यांनी यावेळी केले.
निजामकाळी कुणबी प्रमाणपत्र मिळाले असतील तर त्यांना आरक्षण द्या. मराठा समाजाला आरक्षणास देण्यात विरोध नाही, परंतु मराठा समाजाला वेगळे आरक्षण द्या, आमच्या आरक्षणात तुम्ही येऊ नका, आमच्या ३५४ जाती असून ५४ टक्केपेक्षा जास्त लोक आहेत, असेही भुजबळ म्हणाले.
आरक्षण गरिबी हटावचा कार्यक्रम नाही. समानता निर्माण करण्यासाठी आहे. ७० वर्षाच्या लढ्यानंतर आम्हाला आरक्षण मिळाले असून अजूनही समाज मागासच आहे. त्यामुळे मराठा समाजाच्या आरक्षणाला विरोध नाही, पण सरसकट ओबीसीतून नको, तर स्वतंत्र आरक्षण द्या, अशी मागणी मंत्री छगन भुजबळ यांनी यावेळी केली. यासाठी माळी, कोळी, धनगर, वंजारी, तेली, तांबोळी साळी यांनी वेगळवेगळा आवाज उठवू नये, सर्वांनी एकत्र आवाज उठवावा.
राज्यात गेल्या काही दिवसांपासून मराठा आरक्षणाच्या मागणीसाठी आंदोलन सुरू आहे. मनोज जरांगे- पाटील यांनी राज्य सरकारला २४ डिसेंबरपर्यंत वेळ वाढवून दिला आहे. जरांगे – पाटील यांनी सरसकट मराठा प्रमाणपत्राची मागणी केली आहे. दरम्यान, मंत्री छगन भुजबळ यांनी राज्यभरात दौरे सुरू केले आहेत.