पुणेः आएएस, आयपीएस आणि राजकीय लोकांसोबत आपली मोठी ओळख असल्याचे सांगून, आर्थिक गुंतवणूकीवर आकर्षक व्याजाचे आमिष दाखवून एका आयटी अभियंत्याला तब्बल 47 लाख 80 हजार रुपयांचा गंडा घातल्याचा प्रकार समोर आला आहे. याप्रकरणी, चतुःश्रृंगी पोलिसांनी दिपक रमेश शिंदे (वय.27,रा. डी- 301 रोहन फेज 1 बाणेर, मुळ. बेलपिंपळगाव नेवासा) याच्या विरुद्ध फसवणूकीचा गुन्हा दाखल केला आहे. याबाबत बाणेर येथील 35 वर्षीय अभियंत्याने फिर्याद दिली आहे. हा प्रकार 10 डिसेंबर 2021 ते 20 एप्रिल 2022 या कालावधीत घडला आहे. सीए फायनान्सर, शेअर मार्केट,स्वामी समर्थ पंडीत, हात पाहतो, लोकांच्या घरी जावून पुजा अर्चा करतो, एमपीएससीचा अभ्यास करतो अशी बतावणी करत त्याने ही फसवणूक केली आहे.
पोलिसांनी दिलेल्या माहितीनुसार, आरोपी शिंदे हा लोकसेवा व राज्यसेवेची तयारी करत होता. त्याला त्यामध्ये काही यश आले नाही. एका मित्राच्या माध्यमातून फिर्यादी अभियंत्याचा शिंदे याच्यासोबत परिचय झाला होता. त्यावेळी त्याने अभियंत्याला तो सीए फायनान्सर, शेअर मार्केट, स्वामी समर्थ पंडीत, हात पाहतो, लोकांच्या घरी जाऊन पुजा अर्जा करतो, तसेच तो स्पर्धा परिक्षेची देखील तयारी करतो असे सांगितले. शिंदे हा स्पर्धा परिक्षेची तयारी करत असताना, त्याचा अनेकांसोबत परिचय होता. त्यातील काहीजण पोलिस व महसूल खात्यात अधिकारी असल्याचे तो सांगतो. त्यांच्यासोबत आपला जवळचा परिचय असून, त्यांचे पैसे त्याच्याकडेच गुंतवणूकीला असल्याचे देखील तो सर्वांना सांगत असे. तसेच त्याची बहीण अहमदाबाद येथे जिल्हाधिकारी असल्याची बतावणी करून त्याने फिर्यादींना जाळ्यात खेचले.
त्यानंतर शिंदे याने फिर्यादींना सांगितले की, आपण सरकारची जमीन विकत घेणार आहोत. त्यामध्ये गुंतवणूक करू, तसेच माझ्याकडे मोठ-मोठे फायनान्सर आहेत. ते अल्पकालाधीची गुंतवणूक करतात, त्या बदल्यात मी तुला दहा, पंधार ते वीस टक्के असे व्याज देईल असे सांगून वेळोवेळी फिर्यादी अभियंत्याकडून 47 लाख 80 हजार रुपये घेतले. एवढेच नाही तर अभियंत्याच्या पत्नीकडून देखील त्याने पैसे घेतले आहेत. अभियंत्याला गुंतवणूक केल्यानंतर काही कालावधीत शिंदे याच्याबाबत संशय येऊ लागला होता. मात्र त्याने बोलण्याच्या नादात अभियंत्याला गुंतवून ठेवले. खूप कालावधी लोटल्यानंतर न व्याजाचे पैसे मिळत आहेत ना मुद्दल हे लक्षात आल्यानंतर अभियंत्याने शिंदे याच्यामागे पैसे मागण्याचा तगादा लावला. त्यावेळी त्याने अभियंत्याला पैसे पाठवले आहेत. ज्याच्याकडे दिले तो पळून गेला आहे. दोन दिवसात मिळतील, फायनान्सरकडे आलो आहे अशी विविध कारणे सांगून वेळ मारून नेली.
पत्नीची आई आजारी पडल्यानंतर अभियंत्याने शिंदे याच्याकडे सहा लाखाची मागणी केली. त्यावेळी त्याने सहा लाख रुपये पाठवल्याचा मेसेज पाठवला. मात्र बँकेत चौकशी केली असता, तो बनावट असल्याचे समजले. आपली फसवणूक झाल्याचे लक्षात आल्यानंतर फिर्यादीने याबाबत चतुःश्रृंगी पोलिस ठाण्यात तक्रार अर्ज दाखल केला होता. त्या तक्रार अर्जाच्या चौकशीनंतर पोलिसांनी हा गुन्हा दाखल केला आहे. शिंदे याने अनेकांना असा गंडा घातल्याची शक्यता पोलिसांनी वर्तवली असून, त्या दृष्टीने त्यांनी तपास सुरू केला आहे.
अभियंता जेव्हा शिंदे याच्याकडे पैसे मागत होता. त्याच कालावधीत त्यांच्या घरी एक निनावी पत्र आले. त्यामध्ये तुझ्यामुळे माझे सत्तर लाख रुपयांचे नुकसान झालेे आहे. तसेच तु जेव्हा सिंगापुर येथे होता. तेव्हा आमचा एक माणून विमानतळावर पकडाल गेला. त्याला दोन वर्षासाठी जेल झाली. आम्ही तुझ्या घरावर नजर ठेवून आहोत. तुला आणि तुझ्या परिवाराला जर जीवंत राहयचे असेल तर मी सांगतो तसे कर माझी माणसे लक्ष ठेवून आहेत. तु जर पोलिसांकडे गेला तर त्याचे परिणाम वाईट होतील. हा प्रकार घडल्यानंतर शिंदे याला अभियंत्याने फोन केला. त्यावेळी मी सर्व पाहून घेतो. माझे सर्वांशी बोलने झाले आहे. तुसरे लेटर आले तर पाहू असे सांगून वेळ मारून नेली.
अभियंत्याने पैशाची मागणी केली असता, शिंदे याने पैसे असेलेल्या बॅगेचे फोटो दाखवून येरवडा परिसरात त्यांना पैसे घेऊन जाण्यासाठी बोलावले. ते तेथे गेले असता, शिंदेचा फोन बंद लागला. त्यामुळे ते घरी परतले तेव्हा त्यांना नामदेव जाधव नावाच्या व्यक्तीने फोेन करून शिंदे याला पोलिसांनी पकडले आहे. त्यामुळे त्याला फोन करू नका असे सांगितले. त्यानंतर शिंदे याने फिर्यादीला फोन करून सांंगितले की त्याला ईडीने पकडले असून, त्याची सर्व प्रॉपर्टी जप्त केली आहे. त्यावेळी फिर्यादींना फसवणूक झाल्याचे लक्षात आले. मात्र तो पर्यंत वेळ निघून गेली होती.
शिंदे याने फिर्यादींना गुंतवणूकीवर आकर्षक व्याज देण्याचे प्रलोभन दाखवून ही फसवणूक केली आहे. जर अशाप्रकारे कोणीची फसवणूक झाली असेल तर त्यांनी चतुःश्रृंगी पोलिसांशी संपर्क करावा.
शामल पाटील, पोलिस उपनिरीक्षक