यवतमाळ : पुढारी वृत्तसेवा दोन दिवसांपूर्वी आपल्या मित्रांसोबत देवदर्शनासाठी गेलेल्या युवकाचा ओमकारेश्वर येथील नर्मदा नदीत बुडून मृत्यू झाला. ही घटना गुरुवारी सांयकाळी ४ च्या सुमारास घडली.
दिनेश अमोल कदम ( वय १९) असे मृत्यू झालेल्या युवकाचे नाव आहे. तो महागाव तालुक्यातील पोहंडूळ येथील रहिवासी होता. पोहंडूळ येथील १४ युवक देवदर्शनासाठी दोन दिवसापूर्वी निघाले. त्यांनी एक-दोन ठिकाणी दर्शन घेऊन लगेच ओमकारेश्वर येथे दर्शनासाठी गेले. त्यादरम्यान ओंकारेश्वर येथील नर्मदा नदीवर अंघोळ करत असताना पाण्याची पातळी लक्षात न आल्याने दिनेश कदम याचा नदीत बुडून मृत्यू झाला. तेथील रेस्क्यू टीमने त्या युवकाला नदीच्या बाहेर काढले व नातेवाईकांना माहिती दिली. माहिती मिळताच नातेवाईक ओंकारेश्वर येथे पोहोचले व शुक्रवारी सायंकाळी त्या युवकाला गावी आणून त्याच्यावर अंत्यसंस्कार करण्यात आले.