यवतमाळ : भविष्यात २० लाखाच्या कामांचे देयके मिळवून देण्यासाठी 20 टक्के दराने चार लाख रुपये लाच स्वीकारताना विद्युत वितरण कंपनीचे कार्यकारी अभियंत्यांना रंगेहाथ ताब्यात घेण्यात आले आहे. ही कारवाई अमरावती लाचलुचपत विभागाच्या वतीने शुक्रवारी पुसद येथे करण्यात आली.
जनार्दन चव्हाण (वय 57), असे लाचखोर अधिकार्याचे नाव आहे. वीज वितरणाच्या पुसद उपविभागात ‘ब्रेकडाऊन‘ व ‘मेंटेनन्स‘ची 20 लाख रुपयांची एकूण नऊ कामे होती. या कामाची वर्कऑर्डर कंत्राटदाराला देण्यात आली होती. तत्पूर्वी देयके निकाली काढण्यासाठी कार्यकारी अभियंता जनार्दन चव्हाण यांनी 20 टक्के प्रमाणे चार लाख रुपयांची मागणी केली.
पैसे शुक्रवारी रात्री साडेनऊ वाजताच्या सुमारास विद्युत भवनच्या शासकीय निवासस्थानात स्वीकारण्याचे मान्य केले होते. या मागणीनंतर कंत्राटदाराने थेट अमरावती लाचलुचपत विभागाकडे लेखी तक्रार केली होती. या तक्रारीवरून लाचलुचपत विभागाच्या पथकाने सापळा रचला असता आरोपी कार्यकारी अभियंता जनार्दन चव्हाण यांना चार लाख रुपये घेताना रंगेहाथ ताब्यात घेण्यात आले आहे.
या प्रकरणी पुसद शहर पोलिस ठाण्यात कार्यकारी अभियंत्याविरोधात गुन्हा नोंद करण्यात आला आहे. दरम्यान, लाचलुचपत विभागाने आरोपीच्या घराची झाडाझडती घेतली. त्यात नेमकं काय सापडले हे कळू शकले नाही. ही कारवाई पोलिस अधीक्षक बापू बांगर, पोलिस उपअधीक्षक राजेश राठोड, पोलिस उपअधीक्षक मंजूषा भोसले, पोलिस निरीक्षक रवींद्र सहारे, संजय शिंदे, अभय वाघ, वैभव जायले, मोहन ठाणेकर, राजेश बहिरट, उमेश बुजाडे, आदींनी केली.