यवतमाळ : पुढारी वृत्तसेवा, कौटुंबिक कलहातून लोखंडी रॉडने हल्ला करून पतीनेच पत्नीची हत्या केली. ही घटना आज सोमवार दि. १४ एप्रिल रोजी दुपारी शहरातील गाडगे नगर परिसरात घडली.
शालू प्रवीण शास्त्रकार असे मृत महिलेचे नाव आहे. तर बाळू उर्फ प्रवीण शास्त्रकार (वय ४२) असे आरोपीचे नाव आहे. आज सोमवारी दुपारच्या सुमारास पती प्रवीण व पत्नी शालू या दोघांमध्ये वाद झाला. त्यानंतर पती प्रवीणने लोखंडी रॉडने पत्नी शालूवर हल्ला चढविला. त्यात शालू गंभीरित्या जखमी झाली. त्यातच तिचा मृत्यू झाला. दरम्यान घटनेनंतर मारेकऱ्याने स्वतः पोलिस ठाणे गाठून गुन्ह्याची कबुली देत आत्मसमर्पण केले. या घटनेची माहिती मिळताच शहर पोलिसांनी घटनास्थळ गाठले. पंचनामा करून मृतदेह वसंतराव नाईक शासकीय रुग्णालयात शवविच्छेदनासाठी पाठवला. या घटनेने शहरात खळबळ उडाली आहे.